Suu Kyi segir stjórn Búrma reyna að verja alla þegna sína

Aung San Suu Kyi, leiðtogi Búrma, segir að ríkisstjórn hennar geri sitt besta til þess að verja alla borgara landsins í Rakhine-héraði þar sem á annað hundruð þúsund rohingjamúslima hafa flúið ofsóknir.

Samfélag rohingja í Rakhine-héraði hefur sótt ofsóknum hersins eftir að uppreisnarmenn gerðu árás á herstöð 25. ágúst. Hermenn eru sakaðir um að brenna þorp, myrða íbúa og nauðga konum.

Alls hafa nú 164.000 manns flúið ofsóknirnar yfir landamærin til Bangladess. Margir Búrmamenn líta á rohingjafólkið sem ólöglega innflytjendur frá Bangladess.

Minntist ekki beint á flótta rohingja

Suu Kyi hefur sætt harðri gagnrýni á vesturlöndum fyrir að koma rohingjafólkinu ekki til varnar. Sumir hafa jafnvel kallað eftir því að hún verði svipt friðarverðlaunum Nóbels sem hún hlaut árið 1991.

Í dag tjáði hún sig loks um ástandið í Rakhine en minntist ekki beint á fólksflótta rohingja þaðan, að því er segir í frétt Reuters-fréttastofunnar.

„Við verðum að hugsa um alla borgara okkar, við verðum að annast alla sem eru í landinu okkar, hvort sem þeir eru borgarar okkar eða ekki,“ sagði Suu Kyi.

Kenndi hún hryðjuverkamönnum um að dreifa miklu magni misvísandi upplýsinga um átökin í Rakhine.