Fjársvik Kickstarter-bróður bæði „skipulögð og úthugsuð“

Einar Ágústsson, sem í dag fékk þungan dóm í tugmilljóna fjársvikamáli, á sér engar málsbætur að mati Héraðsdóms Reykjaness. Brotavilji hans hafi verið einbeittur og brot hans „skipulögð og úthugsuð“. Hægt sé að slá því föstu að fjárfestingasjóðurinn sem Einar sagðist starfrækja hafi í raun ekki verið starfræktur.

Þetta er meðal þess sem kemur fram í dóminum yfir Einari sem var dæmdur í þriggja ára og níu mánaða fangelsi í Héraðsdómi Reykjaness í morgun fyrir fjársvik og brot á gjaldeyrislögum.

Sjá einnig: Leggur fram leit í Google og fréttir af Vísi og RÚV í umfangsmiklu fjársvikamáli

Einar var ákærður, ásamt félaginu Skajaqouda ehf., sem hann var í forsvari fyrir, fyrir að hafa blekkt fjóra einstaklinga sem létu honum í té 74 milljónir króna, annars vegar tveir karlmenn og ein kona sem samtals létu af hendi 30 milljónir og hins vegar karlmaður sem lét af hendi 44 milljónir króna. Hann neitaði sök. 

Einstaklingarnir létu Einari í té fjármunina í þeirri trú að féð myndi renna til fjárfestinga í fjárfestingasjóði í Bandaríkjunum sem héti Skajaquoda Fund. Kynnti hann fjárfestingasjóðinn sem öruggan og ábatasaman fjárfestingakost og sendi hann meðal annars fréttabréf til einstaklingannna með upplýsingum um ávöxtun sjóðsins.

Einar hefur í fjölmiðlum verið nefndur Kickstarter-bróðir eftir að hann, ásamt bróður sínum, söfnuðu fé í gegnum hópfjármögnunarsíðuna Kickstarter fyrir hin ýmsu verkefni.

„Í lófa lagið“ að framvísa haldbærum gögnum um sjóðinn

Málsvörn Einars byggðist að stórum hluta á því að rannsakendur málsins, sem og saksóknari, hafi ekki haft þekkingu á því félagaformi sem var á rekstri Skajaquoda Capital LLC. Þessi vanþekking og skilningsleysi hafi litað ákæruna í málini og afstöðu saksóknara til ákæruliða.

Taldi Einar sig hafa sýnt fram á að Skajaqouda Fund væri í raun og veru til, hann hafi verið sjálfstæð eining innan Skajaquoda Capital LLC. Lagði Einar fram staðfestingu bandarískra skattyfirvalda á kennitölu sjóðsins. Því hafi fullyrðingar um að sjóðurinn hafi ekki verið til, verið rangar.

Sjá einnig: „Þú ættir að skammast þín að vera hérna“

Í dómnum er lítið gefið fyrir þessar skýringar Einars og segir að framburður Einars hjá lögreglu, sem og fyrir dómi, hafi „verið mjög óljós varðandi meintan sjóðsrekstur hans eða félaga á hans vegum.“ Hann hafi ekki getað gefið haldbærar upplýsingar um starfsemi sjóðsins, hverjar helstu fjárfestingar væru eða hversu margir fjárfestar væru í sjóðnum.

Telur héraðsdómur að Einari hafi verið „í lófa lagið, væri fullyrðingar hans um sjóðsreksturinn réttar, að framvísa einhverjum haldbærum gögnum um þann rekstur.“ Það hafi hann hins vegar ekki gert.

Var það því mat dómsins að ákæruvaldið hefði fært nægar sönnur á það að „í reynd hafi ekki verið starfræktur sjóður með nafninu Skajaqouda Fund“.

Útskýringar „óskýrar og þokukenndar“

Í dóminum segir að allur framburður Einars í málinu hafi verið óskýr og þokukenndur, þá sérstaklega þegar Einar reyndi að skýra hvað hafi orðið af þeim 30 milljónum sem þrír af þeim fjórum einstaklingum létu honum í té. Ekki tókst að upplýsa við rannsókn málsins hvað varð af þeim fjármunum en voru þeir raktir til Þýskalands sem og í fjárfestingu í gegnum vefsíðuna aupay.net.

Fyrir dómi sagði Einar að hann teldi að peningarnir væru enn þar sem hann sendi þá, óhreyfðir.

Aftur gaf héraðsdómur lítið fyrir þessar skýringar og sagði það sæta furðu að Einar skyldi ekki hafa „veitt atbeina sinn til þess að nálgast þá fjármuni vitnanna,“ miðað við þær útskýringar hans að fjármunirnir væru enn á sama stað.

Sjá einnig: Kannast ekki við að hafa tekið á móti tíu milljónum í plastpoka

Við rannsókn málsins lagði sérstakur saksóknari hald á 67,5 milljónir króna á reikningum Skajaqouda ehf. Samkvæmt dómi héraðsdóms mun sú upphæð, ásamt vöxtum frá árinu 2013, samtals tæpar 75 milljónir króna renna til greiðslu skaðabótakrafna einstaklinganna sem Einar var fundinn sekur um að hafa svikið fé út úr. Nægir hún til þess að greiða höfuðstól skaðabótakrafna þeirra.

Í dóminum segir meðal annars að af gögnum málsins megi ráða að hluti þeirra fjármuna sem lagður var hald á, hafi komið frá karlmanninum sem lét af hendi 44 milljónir króna.

Einar var einnig sakfelldur fyrir brot á gjaldeyrislögum en sýknaður af ákæru um skjalafals. Hann var sem fyrr segir dæmdur í þriggja ára og níu mánaða fangelsi. Þá þarf hann að greiða málsvarnarlaun verjenda síns, 8,4 milljónir auk annars málskostnaðar.