Einar er ákærður, ásamt félaginu Skajaqouda ehf., sem hann var í forsvari fyrir, að hafa blekkt fjóra einstaklinga sem létu honum í té áðurnefnda upphæð, annars vegar tveir karlmenn og ein kona sem samtals létu af hendi 30 milljónir og hins vegar karlmaður sem lét af hendi 44 milljónir króna.
Einstaklingarnir sem um ræðir báru allir vitni fyrir dómi í dag en skýrsla var tekin af Einari fyrir hádegi. Hann neitar sök og segist alltaf hafa verið heiðarlegur í samskiptum við þau sem hann er sakaður um að hafa blekkt.
Ég var hafður að fífli í þessuÖll voru þau spurð af saksóknara hvort þau hefðu haft einhverja sérstaka þekkingu á fjárfestingum og voru svörin öll á sömu leið.
„Nei, það geri ég ekki. Ég hef verið að fjárfesta í gegnum tíðina en fæ alltaf menn til að aðstoða mig við það,“ sagði einn þeirra. Öll svöruðu þau játandi, spurð hvort þau hafi leitað til Einars sem sérfræðings í fjárfestingum, og að hann hefði kynnt sig fyrir þeim sem slíkur.
Báru þau vitni um að Einar hefði kynnt fyrir þeim gögn sem sýndu fram á „fína ávöxtun“ en fyrr í aðalmeðferð málsins hafði komið fram að kynnt var að sjóðurinn hefði náð um 40 ávöxtun árið 2009.
Höfðu mikla trú á honum
„Ég hafði trú á honum og taldi okkur vera að gera hárrétta hluti,“ sagði einn þeirra. „Hann sýndi okkur fram á mjög flotta ávöxtun á sama tíma og það var engin ávöxtun hérna heima,“ sagði annar.Þrír af einstaklingnum létu saman eða í sitt hvoru lagi alls 30 milljónir í fjárfestingarsjóð Einars en ákváðu fyrst um sinn að prófa að taka þátt með fimm milljónum.
„Við létum reyna á það í smátíma. Hann sýndi okkur ávöxtun og annað þannig að það var ákveðið að setja aðrar tíu sem við gerðum í sameiningu.“
Ég gæti verið með asnaeyru hérnaAllt hafi litið vel út þangað til einn þeirra hafi þurft að leysa út sína fjárfestingu. Það hafi gengið illa að fá það í gegn hjá Einari og smám saman fóru tvær grímur að renna á einstaklinganna og á endanum leituðu þau til lögmanns til þess að endurheimta fjármuni sína.
Á endanum bauðst Einar til þess að endurgreiða 28 milljónir en það tilboð virðist hafa verið sett á ís. Daginn eftir að tilboðið var lagt fram var Einar hnepptur í gæsluvarðhald vegna málsins.
Líkt og fram hefur komið á Vísi er ekki ágreiningur um tvær af þeim þremur greiðslum sem einstaklingarnir þrír lögðu fram en Einar hafnar því að hafa tekið á móti greiðslu upp á tíu milljónir í reiðufé. Einn einstaklinganna segir að hann hafi afhent honum reiðuféið í plastpoka
Fauk í eitt vitnið
Raunar fauk í einn einstaklinginn þegar saksóknari spurði hann, í ljósi þess að Einar hafði neitað því að hafa tekið á móti tíu milljónunum, hvort að rétt gæti verið að Einar hefði í raun ekki tekið á móti fjármununum.„Nei, það er ekki rétt. Það er svo alveg kolrangt. Þetta var tekið út af reikningnum okkar og hann fékk það,“ sagði hann áður en hann sneri sér að Einari og sagði: „Þú ættir að skammast þín að vera hérna.“
Skarst þá dómari í leikinn og bað vitnið vinsamlegast um að svara spurningum málsins.
Spurningar verjanda til einstaklinganna snerust fyrst og fremst um hvort að einstaklingarnir hefðu kynnt sér þau gögn sem Einar hafði kynnt þeim til þaula. Flest sögðust þau ekki hafa gert það. Báru þau ýmist við þekkingarleysi, lélegri enskukunnáttu og þeirri staðreynd að þau hefðu einfaldlega treyst Einari.
Nokkuð var fjallað um Einar og bróður hans í fréttum á liðnu ári, meðal annars vegna þess að þeir söfnuðu metfé á fjármögnunarsíðunni Kickstarter fyrir ferðavindtúrbínum sem þeir ætluðu að framleiða
Þá gerðu þeir bræður einnig kröfu á ríkissjóð vegna 33 milljón króna sóknargjalda sem ekki hafa verið greidd til trúfélags Zúista á Íslandi. Bræðurnir eru tveir af þremur stofnendum félagsins sem var endurvakið af hópi manna sem hét því að endurgreiða meðlimum trúfélagsgjöld frá ríkinu.
Málið er í nokkurs konar pattstöðu en bræðurnir vilja peningana út úr félaginu og til sín.
Skýrslutöku er lokið í dag en málflutningur í málinu fer fram á föstudag. Í framhaldinu verður kveðinn upp dómur innan fjögurra vikna frá föstudegi.
