Þriggja marka tap FH-inga í Slóvakíu

FH tapaði með þriggja marka mun fyrir Tatran Presov, 24-21, í fyrri leik liðanna í 3. umferð EHF-bikarsins í Slóvakíu í kvöld. Staðan í hálfleik var jöfn, 11-11.

FH spilaði fínan varnarleik í leiknum í kvöld en sóknarleikurinn klikkaði. Þá var markvörður heimamanna í miklum ham og varði um helming þeirra skota sem hann fékk á sig.

Það hjálpaði FH-ingum heldur ekki til að í stöðunni 22-20 var fullkomlega löglegt mark dæmt af Óðni Þór Ríkharðssyni.

Einar Rafn Eiðsson var markahæstur í liði FH með átta mörk. Arnar Freyr Ársælsson kom næstur með fjögur mörk.

Seinni leikur liðanna fer fram í Kaplakrika eftir viku.

Mörk FH:

Einar Rafn Eiðsson 8, Arnar Freyr Ársælsson 4, Jóhann Karl Reynisson 2, Jón Bjarni Ólafsson 2, Ísak Rafnsson 2, Óðinn Þór Ríkharðsson 2, Gísli Þorgeir Kristjánsson 1.