Innlent

Vænta þess að Hæstiréttur leiðrétti Jökulsárslónsdóminn í héraði

Kolbeinn Tumi Daðason skrifar
Jörðin Fell liggur að austanverðu Jökulsárlóni. Jökulsárlónið sjálft er hins vegar að langmestu leyti í ríkiseigu. Myndin er samsett.
Jörðin Fell liggur að austanverðu Jökulsárlóni. Jökulsárlónið sjálft er hins vegar að langmestu leyti í ríkiseigu. Myndin er samsett. Vísir/Valli
Fjárfestirinn Gísli Hjálmtýsson og félagar hans í Fögrusölum ehf. hafa áfrýjað dómi í máli þeirra gegn íslenska ríkinu til Hæstaréttar.

Héraðsdómur Suðurlands sýknaði íslenska ríkið á föstudaginn en Fögrusalir töldu, og telja enn, að brotið hafi verið á félaginu varðandi kaup þess á jörðinni Felli við Jökulsárlón.

Jón Þór Ólason, lögmaður og lektor í refsirétti.Aðsend
Reikna með leiðréttingu

Jón Þór Ólafsson, lögmaður og lektor í lögfræði við Háskóla Íslands, flutti málið fyrir hönd Fögrusala í héraði. Hann segir að Fögrusalir hafi samdægurs, eftir að hafa lesið í gegnum dóminn, ákveðið að áfrýja málinu til Hæstaréttar.

„Enda sé sú lögskýring sem fram kom í dómnum í andstöðu við þau lögskýringasjónarmið sem beitt hefur verið í túlkun forkaupsréttaráhrifa, bæði er varðar dómaframkvæmd Hæstaréttar sem og Mannréttindadómstólsins.“

Jón Þór segir að forkaupsréttarákvæði megi aldrei túlka rýmkandi lögskýringu.

„Við væntum þess að Hæstiréttur muni leiðrétta þennan dóm og kveða upp dóm sem er Fögrusölum í vil.“

Gísli Hjálmtýsson fer fyrir hópi fjárfesta sem ætlar sér jörðina Fell við Jökulsárlón. Kaupverðið var 1,5 milljarður króna.Háskólinn í Reykjavík
Tekið fyrir í Hæstarétti

Hæstiréttur hefur þegar gefið út áfrýjunarstefnu í málinu og verður málið því tekið fyrir á nýju ári í Hæstarétti. Málum úr héraði sem er áfrýjað eftir 1. desember fara fyrir nýjan áfrýjunardómstól, Landsrétt.

Fögrusalir keyptu jörðina Fell á uppboði í nóvember 2016 á rúman 1,5 milljarð íslenskra króna. Ríkið keypti svo jörðina með forkaupsrétti í janúar 2017. Fögrusalir telja forkaupsréttinn hafa verið runninn út og telja raunar að óeðlilega hafi verið staðið að málum á fleiri stigum málsins. Síðastliðið sumar friðlýsti umhverfisráðherra jörðina.

Reikna má með því að Hæstiréttur kveði upp dóm í málinu á nýju ári.

 


Tengdar fréttir

Mest lesið


Fleiri fréttir

Sjá meira


×

Mest lesið