Innlent

Zúistar endurgreiða en gefa ekki upp hve mikið

Birgir Olgeirsson skrifar
Zúistar byggja á trúarbögðum Súmera til forna. Ágúst Arnar Ágústsson er forstöðumaður félagsins.
Zúistar byggja á trúarbögðum Súmera til forna. Ágúst Arnar Ágústsson er forstöðumaður félagsins. Vísir

Trúfélagið Zuism hefur hafið endurgreiðslur til meðlima félagsins. Þeir sem hafa óskað eftir endurgreiðslu hjá félaginu hafa sumir hverjir greint frá því á Facebook að þeir hafi fengið 19.976 krónur endurgreiddar. 

Forsvarsmenn félagsins höfðu heitið því í byrjun mánaðar að endurgreiðslu myndu berast um miðjan nóvember.  Var gefið upp að umsóknarfrestur yrði til fimmtánda nóvember og endurgreiðslur myndu hefjast að honum loknum.

Á vef félagsins zuizm.is
 þurfti að gefa upp fullt nafn, netfang, kennitölu og bankanúmer til að fá endurgreiðsluna og þá gátu þeir sem tilheyra þessu félagi einnig óskað eftir því þar að endurgreiðslunni yrði ráðstafað til góðgerðarmála. 

Vefurinn hrundi vegna álags
Ágúst Arnar Ágústsson, forstöðumaður félagsins, segir í samtali við Vísi að hann hafi ekki að svo stöddu upplýsingar um það hve margir fengu endurgreitt frá trúfélaginu. Þá hefur hann að svo stöddu ekki upplýsingar um heildarupphæðina sem var endurgreidd til félaga. Sá háttur var hafður á að allir sem sóttu um fengu endurgreiðslu til tveggja ára, sama þó þeir hafi aðeins verið eitt ár í félaginu.

Hann segir ásókn í endurgreiðslu hafa verið það mikla um tíma að vefur félagsins hafi hrunið vegna umferðarinnar.

Annar Kickstarter-bræðra
Ágúst er annar svokallaðra Kickstarter-bræðra. Bróðir hans, Einar Ágústsson, var í desember 2013 skráður sem forvígismaður félagsins í fyrirtækjaskrá eftir að upphaflegur formaður hætti. Einar var í júní síðastliðnum dæmdur í þriggja og hálfs árs fangelsi fyrir fjársvik. Báðir bræðurnir voru til rannsóknar í málinu en aðeins gefin út ákæra á hendur Einari.

Fjársýsla ríkisins mun hafa greitt út rúmar 53 milljónir króna til zúista 9. október síðastliðinn.

Starfsemin var við að lognast út af árið 2014
Starfsemi zúista var við að lognast út af árið 2014. Á árinu 2015 tók nýr hópur manna yfir félagið og hóf að safna meðlimum í stórum stíl með loforðum um að borga þeim út tæplega 11.000 króna sóknargjöld sem renna árlega úr ríkissjóði til trúfélaga fyrir hvern skráðan meðlim. Um þrjú þúsund manns skráðu sig í félagið. Forstöðumaður fyrir hönd þessa hóps, Ísak Andri Ólafsson, var hins vegar settur af með úrskurði innanríkisráðuneytisins í janúar á þessu ári eftir að Ágúst gerði kröfu um það.

Ágúst krafðist jafnframt að innanríkisráðuneytið viðurkenndi hann sem formann trúfélagsins en ráðuneytið vísaði ákvörðuninni til sýslumannsins á Norðurlandi eystra sem nú nýverið tók fyrrnefnda ákvörðun um að verða við kröfu Ágústs.

24. október síðastliðinn voru 2.397 skráðir í félagið. Renna um 900 krónur til félagsins mánaðarlega fyrir hvern þessara meðlima. Það gera um 2,6 milljónir króna mánaðarlega.

Tilkynningu frá Zúistum má lesa hér fyrir neðan:

Trúfélagið Zuism hefur endurgreitt meðlimum sínum að fullu sóknargjöld þeirra fyrir síðustu 2 ár. Allir meðlimir, sem sóttu um endurgreiðsluna, fengu greiddar 19.976 kr.

„Meðlimum var einnig boðið að láta sóknargjöldin renna til góðgerðarmála og voru í kringum 7% sem völdu þann möguleika. Félagið hefur nú í framhaldinu sett til hliðar um það bil 2,5 milljónir kr. sem verður ráðstafað til góðgerðamála. Félagið mun uppfæra þá meðlimi, sem völdu að gefa sóknargjöldin sín, um það hvert þeir fjármunir koma til með að renna,“ segir Ágúst Arnar Ágústsson, forstöðumaður Zuism.

Hann segir að Zúistar stefni á að halda áfram að endurgreiða sóknargjöldin á næsta ári og halda áfram að styrkja góð málefni

„Einnig mun Zuism bjóða meðlimum sínum upp á náms- og bókastyrki á komandi ári. Við hvetjum fólk til að skrá sig í Zuism og eru leiðbeiningar inn á Zuism.is/skraning,” segir Ágúst ennfremur.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.