Gullleitarmenn með ný sýni kærðu synjun úr Þormóðsdal

Niðurstöður úr jarðvegssýnum sem tekin voru í Þormóðsdal í Mosfellssveit í fyrra renna stoðum undir að þar sé að finna gull í vinnanlegu magni. Fyrirtækið Ice­land Resources bíður nú úrskurðar kærunefndar um ákvörðun Mosfellsbæjar um að hafna umsókn þess um framkvæmdaleyfi til rannsókna á magni gulls í bergi.

„Nýju tölurnar eru í samræmi við það sem áður hefur komið fram og staðfesta að gullið sé á svæðinu. Þarna vorum við ekki að bora heldur er þetta úr grjóti á jörðinni en með borun geturðu komist í gullæðarnar og staðfest magnið. Það myndi ekki hafa nein umhverfisleg áhrif,“ segir Vilhjálmur Þór Vilhjálmsson, stjórnar­formaður Iceland Resources.

Fyrirtækið er í eigu kanadíska félagsins St-Georges Platinum & Base Metals Ltd. Samkvæmt kauphallartilkynningu þess þann 12. október síðastliðinn innihéldu sýnin 23, sem tekin voru í september í fyrra eða um svipað leyti og umsókninni var hafnað, frá 0,5 upp í 13,55 grömm af gulli í hverju tonni. Eitt eldra sýni úr dalnum innihélt 415 grömm í tonni en ekki hafa verið tekin ný kjarnasýni með rannsóknarborun þar síðan 2006.

Vilhjálmur Þór hefur áður sagt að hér á landi þurfi gull að mælast yfir tíu grömm í tonni svo það sé vinnan­legt. Aftur á móti geti kanadíska fyrirtækið leitað þess á mun hagkvæmari hátt en þekkist og magnið á hvert tonn geti því verið minna.

„Hér á landi eru oft há gullgildi frekar á litlum svæðum en í föstu bergi, enda gengurðu ekki fram á gullmola á Íslandi,“ segir Vilhjálmur Þór.

Jarðfræðingar á vegum Iceland Resources, sem hefur sótt um alls átta rannsóknarleyfi víðs vegar um landið, tóku á sama tíma sýni í Vopnafirði þar sem fyrirtækið hefur fengið framkvæmdaleyfi til gullrannsókna. 

Einnig hefur Iceland Resources fengið leyfi til rannsókna á 1.013 ferkílómetra svæði á Tröllaskaga. Fréttastofa RÚV greindi á þriðjudag frá ákvörðun 34 landeigenda um að kæra leyfisveitinguna til úrskurðarnefndar umhverfis- og auðlindamála. Orkustofnun veitti leyfið í júlí síðastliðnum en Iceland Resources mun þar leggja sérstaka áherslu á gull og kopar. Landeigendur kvarta yfir samráðsleysi en búast ekki við niðurstöðu úrskurðarnefndarinnar fyrr en um mitt ár 2018. 

„Þeir hafa rétt til að kæra en í raun og veru snýr kæran ekki að okkur heldur stjórnsýslulegri meðferð málsins. Okkar skoðun er að þessi kæra sé byggð á misskilningi og að við höfum ekki fengið tækifæri til að skýra okkar sjónarmið gagnvart landeigendum. Það stendur til að gera það,“ segir Vilhjálmur Þór.