Enn hægir á fjölgun ferðamanna til Íslands

Ferðamönnum fjölgaði um 28% á fyrstu 9 mánuðum ársins. Á síðasta ári fjölgaði ferðamönnum hins vegar um 33% á sama tíma. Hægari fjölgun ferðamanna frá Bandaríkjunum og Bretlandi vegur þyngst í þessari þróun, enda koma 4 af hverjum 10 ferðamönnum sem hingað ferðast frá þessum löndum. Einnig hefur hægt talsvert á fjölgun ferðamanna hingað til lands frá Kanada. 

Áhrifin mest yfir sumartímann 

Jákvætt þykir að árstíðasveifla í ferðaþjónustu hefur verið að minnka undanfarin ár, enda hefur ferðamönnum hlutfallslega fjölgað hraðar á kaldari mánuðum ársins en á háannatíma á sumrin. Ferðamönnum hefur aldrei fjölgað eins hratt á fyrstu fjórum mánuðum ársins eins og á þessu ári. Hægari fjölgun ferðamanna um þessar mundir er því að mestu bundin við sumarmánuði þessa árs. Það sem af er ári hefur þar af leiðandi dregið enn frekar úr árstíðarsveiflu í ferðaþjónustu. Mælingar fyrir septembermánuð gefa þó vísbendingar um að nú hægi á fjölgun ferðamanna utan háannatíma. Fjölgun ferðamanna í september nam 16% frá sama mánuði í fyrra, og hefur ekki verið hægari frá árinu 2013.

Verulega hægir á komum Breta til landsins

Bretar skera sig úr sem ferðamenn til landsins með þeim hætti að flestir þeirra ferðast hingað á kaldari mánuðum ársins. Um tveir af hverjum þremur Bretum sem hingað hafa komið á árinu gerðu það á fyrstu fjórum mánuðum ársins. Japanir hafa svo sambærilega ferðatilhögun. Þannig draga ferðamenn áðurgreindra þjóða úr árstíðarsveiflu í greininni og jafna rekstrargrundvöll ferðaþjónustufyrirtækja að einhverju leyti yfir allt árið. 

Bretum hefur ekki fjölgað jafn hægt frá því að uppgangur ferðaþjónustunnar hófst eftir árið 2010 en það sem af er ári hefur þeim fjölgað um 5%. Þá hefur Bretum fækkað milli ára alla mánuði frá því í apríl. Skertur kaupmáttur Breta á erlendri grundu vegna gengisfalls pundsins hefur eflaust haft talsverð áhrif á þessa þróun.

Höfundur er sérfræðingur í Greiningu Íslandsbanka.