Verður yngri Hansen-bróðirinn samherji Rúnars á næsta tímabili?

Svo gæti farið að danski landsliðsmaðurinn Henrik Toft Hansen verði samherji Rúnars Kárasonar hjá Esbjerg á næsta tímabili.

Hansen, sem hefur leikið með Flensburg síðan 2015, hefur verið orðaður við Ribe-Esbjerg í dönskum fjölmiðlum.

Í samtali við JydskeVestkysten sagði Hansen óvíst hvert framhaldið yrði hjá sér.

„Ég get ekki svarað til um það en það er rétt að samningur minn við Flensburg rennur út í sumar. Við sjáum hvað setur. Ég held öllum möguleikum opnum en tímabilið er bara rétt byrjað,“ sagði Hansen.

Auk Flensburg hefur línumaðurinn öflugi leikið með Mors-Thy, Aalborg, AG Köbenhavn og Bjerringbro-Silkeborg í heimalandinu. Þá var hann tvö ár í herbúðum Hamburg í Þýskalandi.

Hinn þrítugi Hansen varð Evrópumeistari með Dönum 2012 og Ólympíumeistari 2016. Hann er yngri bróðir landsliðsmannsins René Toft Hansen.

Rúnar Kárason hefur skrifað undir þriggja ára samning við Ribe-Esbjerg og gengur í raðir félagsins næsta sumar. Ribe-Esbjerg er í neðri hluta dönsku úrvalsdeildarinnar en ætlar sér stóra hluti á næstu árum.