The Times hvetur ferðamenn að fljúga beint til Akureyrar

Breska fréttaveitan The Times hvetur ferðamenn sem hafa áður ferðast til Reykjavíkur að ferðast heldur til Akureyrar og fara þannig ótroðnar slóðir.

Í greininni kemur fram að á næsta ári verður mögulegt að fljúga beint til Akureyrar frá ellefu borgum í Bretlandi. Innifalið í ferðinni, sem kostar tæplega hundrað þúsund krónur, er gisting í þrjár nætur og skipulögð ferð að Goðafossi og Dimmuborgum.



Ferðaskrifstofan Super Break stendur fyrir ferðunum og tekið er fram að ferðirnar séu tilvaldar til þess að fara á norðurljósaveiðar.

Fjöldinn allur af ferðamönnum ferðast til landsins á hverju ári í þeim tilgangi einum að berja norðurljósin augum og eru væntingar fólks gífurlegar.