Ég fagna að sjálfsögðu enn með íslenska liðinu

„Ég hef lýst því mörgum sinnum eftir EM í fyrra að ferðalag mitt með íslenska landsliðinu var afar sérstakt. Það eru því sterkar tilfinningar að vera kominn loksins aftur á Laugardalsvöll.“

Þetta sagði Lars Lagerbäck, fyrrverandi landsliðsþjálfari Íslands, og þjóðhetja í augum margra eftir afrek íslenska karlalandsliðsins á EM í Frakklandi síðasta sumar, þar sem strákarnir okkar fóru alla leið í fjórðungsúrslit eins og alheimur veit.

„Þetta ferðalag mitt með íslenska landsliðinu er án nokkurs vafa það besta á mínum ferli. Ekki bara út af árangrinum heldur líka vegna íslensku þjóðarinnar, leikmannanna og allra þeirra sem ég kynntist hér.“

Lagerbäck gaf út að hann ætlaði að láta af störfum sem aðalþjálfari eftir að samningur hans við KSÍ rann út. Það entist ekki lengi. Eftir stutta dvöl sem ráðgjafi sænska landsliðsins réði hann sig sem landsliðsþjálfari Noregs.

„Já, það var svolítið galið af mér. Ég þekki yfirmann norska sambandsins [Nils Johan Semb] og hann lagði hart að mér. Ég veit ekki hvað það var, kannski einhver forvitni, en ég ákvað að taka slaginn.“

Lifir með væntingunum

Árangur Íslands á EM í Frakklandi vakti heimsathygli og Lagerbäck fór ekki á mis við hana. „Ég er minntur á það hvert sem ég kem í Evrópu og um allan heim. Allir vilja tala um íslenska landsliðið,“ segir hann. En skyldu Norðmenn ekki hafa þær væntingar að hann fari með norska landsliðið í sömu hæðir og það íslenska?

„Það kann að vera. Væntingarnar í Noregi eru miklar og þeir þrá að komast í lokakeppni stórmóts með liðið sitt. Maður reynir bara að lifa með þeim væntingum og ég get bara gert mitt besta, eins og ég reyndi alltaf að gera þegar ég var með íslenska liðið,“ segir hann.

Fyrstu ár Lagerbäcks á Íslandi mótaði hann kjarna leikmanna sem hann notaði til að byggja upp sterkt lið. Það vill hann gera nú með norska liðið en segir að það muni taka tíma. Hann nýtur þess þó að fylgjast með íslenska liðinu spila eftir að hann kvaddi strákana að lokinni Frakklandsförinni í fyrra.

„Ég hef séð alla leikina í sjónvarpi og þykir mikið til um hvað þeir eru að gera. Ég vona að ég geti gert það sama með Noreg – það er aldrei að vita.“

Svo erfitt að vinna Ísland

Heimir Hallgrímsson hefur náð frábærum árangri með íslenska liðið eftir að hann tók alfarið við þjálfun liðsins. Ísland er ásamt Króatíu efst í sínum riðli í undankeppni HM eftir frækinn sigur á Króötum í Laugardalnum í júní.

„Það var frábært,“ sagði Lagerbäck og brosti. „Strákarnir voru mjög skipulagðir og það sýndi sig í þessum leik hversu erfitt það er að vinna Ísland. Króatarnir lögðu mikið á sig og náðu varla að skapa sér færi undir lokin, þegar þeir lögðu allt í sölurnar.“

Og fagnaði hann þegar Hörður Björgvin skoraði sigurmarkið gegn Króatíu?

„Já, að sjálfsögðu. Mér þykir afar vænt um Ísland, rétt eins og Noreg og Svíþjóð líka. Þessir leikmenn eru í miklum metum hjá mér. Ég fagna alltaf með Íslandi.“

HM-draumurinn raunhæfur

Hann á enn eftir að sjá landsliðið spila í eigin persónu eftir að hann hætti en hann ætlar að bæta úr því við fyrsta tækifæri. „Ég var svo vitlaus að ráða mig í annað starf,“ sagði hann og hló. „Planið var að mæta á alla heimaleiki í Laugardalnum. Ég kem um leið og ég get.“

Lagerbäck telur enn fremur að Ísland eigi raunhæfan möguleika á að komast á HM í Rússlandi. „Sérstaklega ef leikmenn fá nóg að spila með sínum liðum í haust og eru við góða heilsu. En eins og við vitum öll þá skilur oft mjög lítið á milli í fótbolta. En möguleikarnir eru án nokkurs vafa góðir.“