Forseti Póllands hefur 21 dag til að gera upp hug sinn

Andrzej Duda, forseti Póllands hefur 21 dag til að ákveða hvort hann hyggist staðfesta umdeild lög sem fela í sér að pólska þingið og dómsmálaráðherrann skipi dómara.

Samkvæmt lögunum munu allir sitjandi dómarar við Hæstarétt láta af störfum. Efri deild pólska þingsins samþykkti frumvarpið á dögunum að því er fram kemur í frétt The Guardian.

Andstæðingar frumvarpsins og talsmenn Evrópusambandsins hafa bent á það að löggjöfin grafi undan lýðræðislegum ferlum en frá því hægristjórn flokksins Laga og réttlæts tók við völdum árið 2015 hefur hún komið á ýmsum breytingum sem vakið hafa óánægju og reiði fjölda fólks.

Þúsundir mótmælenda eru samankomnir í Varsjá og borgum Póllands til að mótmæla lagasetningunni. Þeir vilja tryggja sjálfstæði dómaranna í landinu gagnvart hinu pólitíska valdi og hrópa „óháðir dómstólar!“

Kannanir sýna að um 55% Pólverja vilja að forseti landsins Aldrzej Duda, synji lögunum staðfestingar en 29% eru hliðhollir lagasetningunni. Duda hefur 21 dag til að gera upp hug sinn en Andrzej Łapiński, talsmaður forseta, sagði ósamræmis gæta í löggjöfinni og að hún væri ekki gallalaus. Hann vildi þó ekki tjá sig um það hvað forsetinn hygðist gera.