Kjarninn tapaði 15 milljónum í fyrra

Hörður Ægisson skrifar 28. júní 2017 08:30

Þórður Snær Júlíusson er ritstjóri Kjarnans en heildartekjur vefmiðilsins námu 38 milljónum á síðasta ári.

Vefmiðillinn Kjarninn var rekinn með 14,9 milljóna tapi 2016 sem er svipuð niðurstaða og árið áður þegar afkoman var neikvæð um 16,7 milljónir. Heildartekjur Kjarnans námu 38 milljónum og jukust um eina milljón króna frá fyrra ári, að því er fram kemur í nýbirtum ársreikningi rekstrarfélags vefmiðilsins, Kjarninn miðlar ehf.

Heildareignir Kjarnans voru 18,5 milljónir í árslok 2016 en skuldir um 6,8 milljónir. Eigið fé nam 11,7 milljónum en í ársbyrjun 2017 var handbært fé Kjarnans 2,8 milljónir. Fram kemur í ársreikningi félagsins að hlutafé þess hafi verið aukið um 18 milljónir á árinu 2016.

Stærstu hluthafar Kjarnans eru Hjálmar Gíslason, stjórnarformaður Kjarnans, og Vilhjálmur Þorsteinsson fjárfestir. Þá á Magnús Halldórsson blaðamaður 13,79 prósenta hlut og Þórður Snær Júlíusson, ritstjóri Kjarnans, 12,2 prósent í miðlinum.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.

Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.