„Það er ómetanlegt að fá starfsreynslu sína metna fyrir nám og gefur af sér óteljandi nýja möguleika í lífinu“

Frá árinu 2004 hafa 3.952 einstaklingar lokið raunfærnimati. Raunfærnimat fer aðallega fram á starfsnámsbrautum og í iðngreinum, en einnig á móti viðmiðum í atvinnulífinu. 

Í mati á raunfærni fær einstaklingurinn metna starfsreynslu sína gagnvart viðmiðum í viðeigandi námskrá. Sem dæmi um hvar hefur verið metið má nefna einstaklinga sem hafa mikla reynslu af skrifstofustörfum, verslunar- og þjónustustörfum, fiskvinnslu, sjómennsku, fiskeldi, úr mötuneytum/eldhúsum, smíðum og rafvirkjun. Hægt er að sjá á vef Fræðslumiðstöðvar atvinnulífsins www.frae.is í hvaða greinum mat hefur farið fram. Þar er einnig hægt að finna upplýsingar um símenntunarmiðstöðvar um allt land sem geta veitt nánari upplýsingar um raunfærnimat og hvernig skal bera sig að.

Hér fyrir neðan sjáum við svo reynslusögur sem sýna ávinning einstaklinga sem hafa farið í gegnum raunfærnimat í hinum ýmsu greinum.

Kristinn Sigurjónsson sölumaður í Fríhöfninni

Raunfærnimat í Verslunarfagnámi hjá MSS

Aðalástæðan fyrir því að ég fór í raunfærnimat var að mig langaði í háskólanám. Ég lauk ekki stúdentsprófi á sínum tíma en kláraði verslunarskólanám í Danmörku. Hefur alltaf langað til að starfa í markaðsgeiranum og langaði í viðskiptafræði í HÍ. Ég hafði því samband við Jónínu náms- og starfsráðgjafa og fór í raunfærnimat og átti eftir það auðveldara með að sækja um í háskólanum. 

Í dag stunda ég nám í Háskóla Íslands með fullri vinnu og gengur vonum framar. Hef þroskast mikið sem einstaklingur og öðlast áhuga fyrir námi. Ég er með mikla lesblindu sem hefur fram að þessu haft neikvæð áhrif á mig. Háskóli Íslands býður upp á mjög góða þjónustu fyrir þá sem eiga við námsörðugleika að stríða. 

Raunfærnimatið hefur fært mér vilja og trú á að ég geti lært og ég myndi ráðleggja öllum að skrá sig í raunfærnimat hjá næstu símenntunarstöð. Það er ómetanlegt að fá starfsreynslu sína metna fyrir nám og gefur af sér óteljandi nýja möguleika í lífinu.

Bryndís Rúnarsdóttir matartæknir í Landsbankanum 

Raunfærnimat í Matartækni hjá MSS í samstarfi við Iðuna fræðslusetur

Ég ákvað að fara í raunfærnimat vegna þess að ég þekkti manneskju sem hafði farið í svona mat. Hún reyndi á sínum tíma að fá mig með en ég var ekki tilbúin þá en sá alltaf eftir því þegar ég sá hjá henni hvað þetta var einfalt. Svo var mér bent á að það væri verið að bjóða upp á raunfærnimat hjá MSS og ákvað að slá til. 

Síðan matið fór fram er ég búin að klára nám í matartækni frá MK sem ég kláraði á 3 önnum með vinnu. Ég fékk helling metið í raunfærnimatinu, var líka búinn með ensku, dönsku, íslensku og stærðfræði svo það var góð byrjun á náminu. 

Ég myndi segja við þann sem er að hugsa um að fara í svona mat að drífa sig því þetta er algjör snilld að eiga möguleika á því að ná sér í réttindi með svona auðveldum hætti. Mér finnst ég öruggari í starfi eftir matið og svo standa mér fleiri möguleikar til boða í starfi. 

Robert Henry Vogt - gæðastjóri

Raunfærnimat í fisktækni hjá MSS

Ég lenti í óhappi út í sjó sem gerði mig óvinnufæran og vildi nýta tímann á meðan. Ég fór í MSS í Reykjanesbæ til að skoða hvaða námskeið væru í boði. Hitti þar hana Jónínu starfs- og námsráðgjafa og hún benti mér á þessa leið.

Fór fyrst í sterkari starfsmaður og í framhaldi af því þá kom sú umræða upp hvort ekki væri gott að senda mig í raunfærnimat. Fór semsagt í raunfærnimat og kláraði í framhaldinu fisktækninn. Tók síðan viðbótanám í Gæðastjórnun. Nú er ég að skoða í kringum mig varðandi vinnu í þessum efnum.

Ég hvet alla eindregið til að fara í raunfærnimat á meðan það býðst. Þetta gefur manni forskot í námið. Að fara í nám á mínum aldri virkar eins og vítamínsprauta í tilveruna.