Kvöldfréttir Stöðvar 2: Áreiti hluti af starfi skemmtikrafta

Þórunn Antonía Magnúsdóttir, söngkona, og Atli Viðar Þorsteinsson, plötusnúður, ræða um áreiti sem því fylgir að hafa atvinnu af því að skemmta öðrum í fréttum Stöðvar 2 í kvöld, en bæði hafa þau orðið fyrir slíku við það eitt að vinna sína vinnu.

Söngkonan Salka Sól Eyfeld var á laugardagskvöldið áreitt af gesti á árshátíð Icelandair sem fram fór í Laugardalshöll þegar hún var við það að stíga á svið.

Salka greindi frá því á Twitter þegar gestur árshátíðarinnar kleip hana í rassinn og viðbrögðin létu ekki á sér standa. Margir skemmtikraftar lenda í slíku áreiti í vinnunni. Þórunn og Atli Viðar þeirra á meðal.

Þorsteinn Guðmundsson, Bubbi og Dóri DNA létu sig málið einnig varða á Twitter og tóku undir með Sölku. 

Sjá einnig: Bubbi hefur oft verið áreittur kynferðislega og skilur Sölku Sól vel: „Konur hafa oft gripið í klof mér og rassinn.“

Þá lýsti Margrét Erla Maack, dansari og plötusnúður, reynslu sinni í Fréttablaðinu í dag. Hún hefur starfað sem plötusnúður og skemmtikraftur í rúman áratug og snemma á ferlinum áttaði hún sig á að áreitni af ýmsum toga af hálfu drukkinna einstaklinga væri partur af starfinu. „Þetta er alveg helmingur af þeim giggum sem ég tek, þá lendi ég í einhvers konar káfi, áreitni eða óviðeigandi athugasemdum,“ sagði Margrét.

Ítarlega verður fjallað um málið og rætt við Þórunni Antoníu og Atla Viðar, í kvöldfréttum Stöðvar 2 sem hefjast á slaginu 18.30.