„Mun ekki gera grundvallarbreytingar á heilbrigðiskerfinu“

Óttarr Proppé heilbrigðisráðherra segir ekki standa til að gera grundvallarbreytingar á heilbrigðiskerfinu. Fyrsta verk hans verði að vinna að heilbrigðisstefnu áður en nokkuð annað verði gert.

Þetta kom fram í máli Óttars við fyrirspurn frá Katrínu Jakobsdóttur, formanni Vinstri grænna, á Alþingi í dag sem sneri að einkarekinni legudeild Klíníkurinnar við Ármúla, enn hún taldi að ef ráðherra myndi heimila starfsemi slíkrar deildar yrði það grundvallarbreyting á heilbrigðiskerfinu.

Óttarr sagði að lögum samkvæmt sé það skylda landlæknis og taka út aðstöðu og starfsemi Klíníkurinnar, líkt og hann hafi gert. Engin ákvörðun hafi hins vegar verið tekin í þessum efnum.

„Það er ekki þar með sagt að tekin hafi verið nein ákvörðun um að semja við Klíníkina um þannig aðgerðir á vegum hins opinbera. Varðandi flóknari aðgerðir hefur hið opinbera fyrst og fremst samið við opinbera spítala, Landspítalann, Sjúkrahúsið á Akureyri og að einhverju leyti héraðssjúkrahúsin, eins og á Akranesi, en ekki hefur verið tekin ákvörðun um neitt annað gagnvart Klíníkinni,“ sagði Óttarr.

Hann sagðist ósammála formanni Vinstri grænna um að um væri að ræða grundvallarstefnubreytingu í heilbrigðismálum.

„Ég held það sé fulldjúpt í árinni tekið hjá hv. þingmanni að skilja orð mín sem svo að hér standi fyrir dyrum grundvallarstefnubreyting, vegna þess að vissulega hefur hið opinbera gert samninga við einkaaðila. Stór hluti heilbrigðisþjónustunnar er nú þegar rekinn af einkaaðilum, sjálfseignarstofnunum, sérfræðingum og svo framvegis. Reglulega hefur verið samið um fyrst og fremst einfaldari aðgerðir við einkafyrirtæki í tengslum við biðlistaátakið sem hefur verið í gangi og verður áfram í tvö ár í viðbót,“ sagði Óttarr á Alþingi í dag.