65 ár frá því að Elísabet tók við bresku krúnunni

Bretar halda í dag upp á að 65 ár séu liðin frá því að Elísabet II tók við bresku krúnunni. Um er að ræða svokallað safírsafmæli.

Í tilefni af afmælinu hefur breska konungshöllin birt ljósmynd af Elísabetu sem ljósmyndarinn David Bailey tók árið 2014 þar sem hún klæðist safírsskarti sem faðir hennar, George VI, gaf henni í brúðkaupsgjöf árið 1947.

Hin níræða Elísabet er fyrsti breski þjóðhöfðinginn sem fagnar svokölluðu safírsafmæli á valdastóli.

Samkvæmt hefð fagnar Elísabet afmælinu á jörðinni Sandringham, en snýr svo aftur til Buckingham-hallar nokkrum dögum síðar.

Elísabet tók við krúnunni á þessum degi árið 1952 þegar faðir hennar lést og hefur hún því setið á valdastóli í 23.742 daga.