Verkfall í háloftunum

„Við erum ekkert sérlega bjartsýn á að það takist að semja áður en það kemur til verkfallsaðgerða,“ segir Sturla Óskar Bragason, varaformaður Flugfreyjufélags Íslands. Félagar í Flugfreyjufélagi Íslands samþykktu á miðvikudag að boða til verkfallsaðgerða ef ekki takist að semja á næstum dögum í kjaradeilu flugfreyja við Flugfélag Íslands. Um 70 prósent greiddu atkvæði með aðgerðinni en rúm 25 prósent gegn henni.

Flugfreyjur hjá Flugfélagi Íslands hafa staðið í kjaradeilu síðan á gamlárs­dag 2015. Í tvígang hafa samningar náðst en báðir voru felldir í atkvæðagreiðslu. Flugfreyjur hafa því verið samningslausar í rúmt ár.

Náist ekki að semja á næstu dögum mun þriggja daga verkfall hefjast að morgni laugardagsins 27. janúar. Þá er gert ráð fyrir ótímabundnu verkfalli frá morgni áttunda febrúar. Verkfallið hefur í för með sér að allt innanlandsflug Flugfélags Íslands fellur niður ásamt flugi félagsins til Skotlands og Grænlands.

Samninganefndir Flugfreyjufélagsins og Flugfélags Íslands munu funda í dag hjá ríkissáttasemjara.

Fréttin birtist fyrst í Fréttablaðinu. Hér fyrir ofan misritaðist dagsetning hins ótímabundna verkfalls. Það hefur verið leiðrétt. Beðist er velvirðingar á mistökunum.