Sjö mánaða skilorðsbundið fangelsi fyrir hættulega líkamsárás gegn fyrrverandi kærustu

Héraðsdómur Reykjavíkur hefur dæmt 26 ára gamlan karlmann í sjö mánaða skilorðsbundið fangelsi fyrir hættulega líkamsárás og eignaspjöll gegn fyrrum unnustu sinni.

Manninum var gefið að sök að hafa fimmtudaginn 12. Júní 2014 sparkað í líkama konunnar sem stóð við bíl hans og hélt í stýri hennar. Hann hafi tekið hana hálstaki og ýtt henni upp að þaki bílsins og síðan ekið bílnum eftir Ásbraut í Hafnarfirði.

Konan var hálf út úr bílnum og dróst með bílnum þar til hann stöðvaði við Haukatorg. Á meðan á akstrinum stóð sparkaði maðurinn í líkama konunnar, sló hana í andlit og líkama og reyndi að losa tak hennar á stýri bifreiðarinnar og loka bilhurðinni á hana.

Maðurinn viðurkenndi að hafa látið bílinn renna áfram þar sem konan hélt í stýri hennar en sagðist hafa gert það á svo lítilli ferð að konan hefði hæglega getað losað sig frá bifreiðinni á ferð. Vitni í málinu segja ljóst að konan hefði ekki getað sleppt takinu án þess að bera skaða af.

Í dómi segir að manninum hafi ekki getað dulist sú hætta sem fylgdi því og að líklegast hefði konan hlotið meiðsl ef hún hefði fallið í götuna, auk þess sem hún hefði getað lent undir bílnum. Brotið þykir sérstaklega hættulegt vegna þeirrar aðferðar sem hann beitti.

Þá var maðurinn einnig ákærður fyrir eignaspjöll með því að hafa eyðilagt iPhone konunnar með því að beygja hann með handafli.

Í dómi héraðsdóms segir að maðurinn hafi stofnað konunni í háska, en hún hlaut umtalsverða áverka af árásinni.

Lagðist inn á geðdeild

Í málinu liggur fyrir vottorð sérfræðilæknis á slysa- og bráðadeild Landspítalans. Þar kemur fram að konan hafi leitað á deildina að kvöldi 12. Júní 2014. Hún hafi sagst hafa orðið fyrir líkamsárás af hálfu fyrrverandi kærasta sem hafi slegið og sparkað í hana og tekið hana hálstaki.

Við skoðun hafi hún verið með klórsár hægra megin á hálsi og marblett fyrir aftan eyra. Þá hafi hún verið með marbletti eftir fingur víðs vegar á handleggjum, þar á meðal stóran marblett á hægri framhandlegg þar sem hafi sést fingraför. Hún var einnig með marbletti á lærum, skrapsár á hnjám og marga misstóra marbletti á leggjum.

Í vottorðinu kemur einnig fram að hún hafi fengið áfallahjálp, hún hafi aftur leitað á deildina nokkrum dögum síðar og þá verið í miklu ójafnvægi og óttaslegin. Hún hafi í kjölfarið lagst inn á geðdeild.

Í málinu liggur einnig fyrir vottorð sálfræðings við áfallamiðstöð landspítalans þar sem greint er frá að allt viðmót konunnar hafi bent til að hún hafi upplifað mikla ógn, ofsaótta og ótta við að deyja eða slasast alvarlega þegar brotið átti sér stað. Greining hafi sýnt að hún hafi þjáðst af áfallastreituröskun í kjölfar árásarinnar.

Fyrir dómi játaði maðurinn að hafa skemmt síma konunnar en neitaði að öðru leyti sök.