Bláa hafið heldur til Frakklands að nýju

Allt að 200 Íslendingar munu halda til Frakklands síðar í mánuðinum til að styðja Viktor Örn Andrésson matreiðslumeistara í Bocuse d’Or keppninni, sem er heimsmeistarakeppni einstaklinga í matreiðslu. Búið er að prenta búninga fyrir stuðningsmenn hans og þegar Fréttablaðið bar að garði við lokaæfingu Viktors var verið að panta þriðju prentun.

Ólafur Helgi Kristjánsson, yfirkokkur á Hótel Sögu, sem heldur utan um búningasöluna hafði varla tíma til að spjalla við blaðamann því það voru svo margir að koma til að kaupa búning. „Ég pantaði fyrst 60 treyjur en það seldist nánast strax upp þannig að ég setti aðra prentun í gang og hún fór líka á undraskömmum tíma þannig að ég er núna bara að taka við pöntunum fyrir næstu pöntun.“

Hann segir að stuðningsmennirnir séu flestir innan matreiðslubransans; kokkar, birgjar og aðrir. Ekki er um skipulagða hópferð að ræða heldur ferðast allir til Lyon, þar sem keppnin fer fram, á eigin vegum. „Það hafa sjaldan eða aldrei verið jafn margir að fara á þessa keppni, um 150-200 manns.

Viktor trekkir að og við, sem erum í kringum þetta hjá honum, höfum mikla trú á að hann standi sig vel. Þetta lítur allavega mjög vel út hjá honum og það er ekki annað hægt að segja en að stemningin sé að magnast upp.“

Ólafur hefur einu sinni áður farið á Bocuse d’Or-keppnina en íslenskir matreiðslumenn hafa alltaf lent í efstu tíu sætunum í keppninni. Árið 2000 tóku Íslendingar fyrst þátt en keppnin er haldin á tveggja ára fresti. „Þessi keppni er svo sérstök miðað við allar aðrar því þetta er eins og fótboltaleikur. Það er ævintýraleg stemning þarna. Það eru stuðningsmannapallar, stuðningsmenn með trommur, stuðningsmannasöngvar, lúðrar og annað. Við fórum fyrir tveimur árum og þá komu Norðmenn með fána og norsku kúabjöllurnar. Þeir völtuðu yfir okkur í stuðningnum og það er ekki að fara gerast aftur.

Viktor er kandídat sem er líklegur til góðra verka og við mætum betur undirbúnir núna til að styðja hann á toppinn. Við erum með stuðningsmannavísur, fána, búninga, lúðra og ég veit ekki hvað og hvað. Það eina sem vantar er alvöru víkingahjálmur,“ segir hann og hlær.

Fréttin birtist fyrst í Fréttablaðinu