Deilur innan Skátanna: Skátahöfðingi stígur til hliðar

Bragi Björnsson hefur ákveðið að stíga til hliðar sem skátahöfðingi Bandalags íslenskra skáta. Það gerir hann í þeirri von að sátt skapist um forystu skátastarfs í landinu. Þetta tilkynnti Bragi á félagsforingjafundi skáta í dag, samkvæmt tilkynningu frá Bandalagi íslenskra skáta.

„Markmið félagsforingjafundarins var að ræða starfslok fyrrverandi framkvæmdastjóra BÍS en honum var sagt upp vegna trúnaðarbrests gagnvart meirihluta stjórnar. Jafnframt voru rædd meðferð tiltekins eineltismáls og vantraustsyfirlýsing sem var borin fram á fundi skáta í Jötunheimum nýverið vegna þessa,“ segir í tilkynningunni.

Skömmu eftir áramót lýstu fjörutíu og fimm skátar yfir vantrausti á Braga og aðstoðarskátahöfðingjann Fríðu Finnu Sigurðardóttur vegna framgöngu þeirra í eineltismáli innan skátafélagsins Ægisbúa og brottvikningu framkvæmdastjóra Bandalags íslenskra skáta, Hermanni Sigurðssyni.

Sjá einnig: Tugir skáta lýsa yfir van­trausti á skáta­höfðingja

Stjórn BÍS áréttar að Bragi og Fríður „höfðu engin afskipti af vinnslu þess eineltismáls sem Skátaréttur ályktaði um síðasta sumar“.

Í tilkynningunni segir að málið hafi verið á milli fullorðinna einstaklinga og þau hafi verið vanhæf vegna tengsla. Það mál var tekið aftur upp í haust og er enn í vinnslu.

„Stjórn Bandalags íslenskra skáta harmar þá stöðu sem upp er komin innan skátahreyfingarinnar og við vonum að það skapist friður í starfi skáta við þessa ákvörðun. Nýr skátahöfðingi verður því kosinn á skátaþingi og mun hann leiða áfram það góða starf sem hreyfingin sinnir út um land allt. Við vonum að nú skapist friður í starfi skáta enda var það markmiðið með fundinum að setja öll mál á borðið og komast að sátt í málinu,” segir Heiður Dögg Sigmarsdóttir, stjórnarmaður í BÍS.

„Skátahreyfingin þakkar Braga fyrir störf hans í þágu hreyfingarinnar undanfarin ár,“ segir Heiður.