Gjörbreytt viðhorf til eftirlitsmyndavéla

Neyðarlínan er með sex eftirlitsmyndavélar í geymslu sem beðið er eftir að verði settar upp miðsvæðis í Reykjavík. Þetta segir Þórhallur Ólafsson, forstjóri Neyðarlínunnar, í samtali við Fréttablaðið. Hann segir að vélarnar verði settar upp á næstu mánuðum og nú liggi fyrir tillögur um átta nýja staði.

Samkvæmt sam­komu­lagi um rekst­ur og viðhald eft­ir­lits­mynda­vél­a milli lög­reglu­stjór­ans á höfuðborg­ar­svæðinu, Neyðarlín­unn­ar og Reykja­vík­ur­borg­ar tekur Reykja­vík­ur­borg að sér að kaupa eftirlitsmynda­vél­ar, Neyðarlína sér um upp­setn­ingu, viðhald þeirra og flutn­ing merk­is og lög­regl­an sér um enda­búnað vegna viðtöku merk­is, vökt­un og viðbragð.

Þórhallur segir að það sé lögreglunnar að ákveða hvar vélarnar átta verða settar upp og Neyðarlínan bregðist við því. „Það er verið að fara yfir stöðuna, hvar fæst leyfi til að setja upp,“ segir Þórhallur.

Í Fréttablaðinu í gær var sagt að eftirlitsmyndavélar hafi verið settar upp árið 1997. Snorri Magnússon, formaður Landssambands lögreglumanna, sagði að fjárhagsstaða lögreglunnar væri slík að hann teldi útilokað að vélum hefði verið bætt við frá þeim tíma eða þær endurnýjaðar.

Þetta kemur ekki heim og saman við fréttaflutning frá árinu 2012 af kaupum á nýjum myndavélum á þeim tíma. Þórhallur segir að í miðbænum séu núna nítján myndavélar. Tíu frá árinu 2012 og níu vélar sem eru tveggja ára gamlar eða yngri. „Og nú eru uppi hugmyndir um að fjölga þessu verulega og breyta um aðferðafræði. Myndavélar af fullkomnustu gerð kosta ekki mikið. Þessi myndavélavæðing í símum hefur alveg gjörbreytt þessu landslagi, þróunin hefur verið mjög hröð,“ segir hann.

Þórhallur segir aftur á móti að viðhorf fólks hafi löngum verið neikvætt gagnvart eftirlitsmyndavélum og það hafi gert það erfiðara að koma myndavélunum fyrir. Viðhorfið sé hins vegar að breytast. „Það er himinn og haf á milli þess sem var fyrir fimm árum og núna,“ segir hann.

Fréttin birtist fyrst í Fréttablaðinu.