Segir veggjöld besta kostinn

Veggjöld til að fjármagna vegaframkvæmdir eru besti kosturinn í stöðunni. Þetta segir fyrrverandi samgönguráðherra sem situr í starfshópi ráðherra um vegaframkvæmdir en hópurinn skilar niðurstöðum sínum í næsta mánuði. Betra hefði þó verið að ráðast í slíkar framkvæmdir fyrr, á tímum kreppu og lítilla framkvæmda.

Jón Gunnarsson, samgöngu- og sveitarstjórnarráðherra, skipaði í febrúar starfshóp til að kanna hvernig hátta megi umfangsmiklum framkvæmdum við stofnleiðir út frá höfuðborgarsvæðinu, bæði Vesturlandsveg og Suðurlandsveg, svo og Reykjanesbraut. Jafnframt er hópnum falið að setja fram tillögur um fjármögnun framkvæmdanna, til dæmis með veggjaldi.

Vinna hópsins gengur vel

Kristján Möller, fyrrverandi samgönguráðherra, á sæti í starfshópnum.

Hvernig gengur vinna hópsins?

„Vinna hópsins gengur mjög vel. Við höfum verið að viða að okkur gögnum sem að komu bæði frá Vegagerðinni og öðrum um þessa vegarkafla sem okkur var upphaflega falið að fjalla um. Við höfum verið að kostnaðarmeta það og það er svona allt að verða tilbúið. Og síðan erum við núna byrjuð að skoða hvaða leiðir eru færar til þess að innheimta veggjöld af þessum nýju leiðum sem verið er að tala um og hvaða aðferð væri best að nota,“ segir Kristján.

Hvaða leiðir eru þar í boði?

„Ja, það er eins og mikið var rætt um í minni tíð og ég ræddi mikið um, svokölluð GPS tækni. Það hefur til dæmis komið í ljós við þessa vinnu að hún er allt of dýr enn þá,“ segir Kristján.

Áróður FÍB

Einnig sé meðal annars hægt að setja tiltekinn búnað í rúður ökutækja. Þá sé ljóst að ekki verða mannaðar gjaldstöðvar.

„Áróður þeirra sem eru andstæðingar þessa verks, eins og Félags íslenskra bifreiðareigenda, að halda að það verði búin til einhver gjaldahlið sem að bifreiðareigendur þurfa að stoppa við og bíða eftir að fá að borga, það er liðin tíð. Tækninni hefur fleygt það mikið fram að þetta er allt orðið sjálfvirkt, eins og við höfum meðal annars fengið kynningu á að verður í Vaðlaheiðargöngum,“ segir Kristján.

Betra á tímum kreppu

Starfshópurinn mun skila niðurstöðum sínum til ráðherra í næsta mánuði og vonast Kristján til þess að fram fari upplýst og málefnaleg umræða um þær. Persónulega sé hann þeirra skoðunar að það að fjármagna vegaframkvæmdir með veggjöldum sé besti kosturinn í stöðunni, en slíkar hugmyndir voru einnig uppi þegar hann gegndi embætti samgönguráðherra.

„Það hefði verið betra að það hefði verið gert á tímum kreppu og lítilla framkvæmda að við hefðum þá farið þær leiðir sem þar voru boðaðar, en því miður ýmsir mæltu gegn. Og það náði ekki í gegn en þá væru margar af þeim leiðum sem að við erum að ræða um núna, þá væru þar búið að framkvæma og komnir miklu betri og öruggari vegir,“ segir Kristján.