Lögreglustjóri hættir störfum

Páll Björnsson, lögreglustjóri á Norðurlandi vestra, hefur ákveðið að segja starfi sínu lausu og mun nýr lögreglustjóri taka við af honum 1. apríl næstkomandi. Mikil ólga hefur verið innan lögregluliðsins upp á síðkastið með stjórnunarhætti Páls og íbúar á svæðinu hafa einnig kvartað undan staðsetningu lögreglumanna.

Fréttablaðið sagði frá því þann 25. október síðastliðinn að ólga væri innan lögregluliðsins en í upphafi októbermánaðar hafi lögreglumenn sent bréf til Páls þar sem krafist væri úrbóta og óskað eftir svörum lögreglustjóra.

Einnig hafa íbúar á svæðinu og sveitarstjórnir óskað svara um mönnun lögreglunnar og bent á að langan tíma hafi tekið fyrir lögreglumann á vakt að komast til Hvammstanga þegar bíll fór í höfnina með þeim afleiðingum að maður lét lífið.

Fréttin birtit fyrst í Fréttablaðinu.