Hræringar halda áfram norður af Grímsey

Jarðskjálfti af stærðinni 3,4 reið yfir skammt norðvestur af Grímsey laust eftir klukkan átta í morgun og annar minni upp á 2,2 tveimur mínútum síðar. Hrina jarðskjálfta hefur verið í gangi á svæðinu síðustu daga.

Nokkrir tiltölulega stórir jarðskjálftar hafa orðið nærri Grímsey frá því á fimmtudag. Sá stærsti þeirra var 4,3 síðdegis þann dag. Stærð hans hefur verið uppfærð en upphaflega var sagt frá því að hann hefði verið 3,9.

Fjöldi skjálfta hefur fylgt í kjölfarið, flestir þeirra af stærðinni einn til tveir. Tveir jarðskjálftar mældust yfir þrír að stærð í gær.