Boða til mótmæla vegna heimsóknar varaforseta Bandaríkjanna

Yfirvöld í Palestínu efndu í dag til mótmælagöngu þegar varaforseti Bandaríkjanna, Mike Pence, fer í opinbera heimsókn til Jerúsalem. Þau vilji með mótmælagöngunni láta í ljós megna óánægju sína og reiði með ákvörðun Bandaríkjaforseta, Donalds Trumps, að viðurkenna Jerúsalem sem höfuðborg Ísrael. Auk þess hefur Mahmoud Abbas, forseti Palestínu, sagst neita alfarið að hitta Pence í fyrirhugaðri heimsókn hans til svæðisins. Þetta kemur fram í frétt AFP.

Heimsóknin kemur, sem fyrr segir, í skugga umdeildrar stefnubreytingar Bandaríkjaforseta í utanríkismálum. Þann sjötta desember síðastliðinn greindi Bandaríkjaforseti frá þeirri ákvörðun sinni að Jerúsalem yrði viðurkennd sem höfuðborg Ísraels auk þess sem sendiráð Bandaríkjanna yrðu flutt til Jerúsalem.

Fjórir drepnir og hundrað og fimmtíu særðir

Í kjölfar ákvörðunar Bandaríkjastjórnar hafa mótmæli verið í Jerúsalem, Vesturbakkanum og Gaza. Herlið Ísraelsmanna skaut fjóra Palestínumenn til bana í gær og þá særðust hundrað og fimmtíu í átökunum, að því er fram kemur í frétt Reuters.

Ákvörðun forsetans hefur víða um heim verið mótmælt harðlega. Palestínumenn segja að með útspili Bandaríkjaforsetans hafi hann ógnað friðarviðræðum. Sádí Arabar fordæma stefnubreytingu Trumps og meirihluti þeirra ríkja sem mynda Öryggisráð Sameinuðu þjóðanna hafa farið fram á neyðarfund.