Barcelona enn ósigrað

Barcelona vann stórsigur á Granollers í spænsku úrvalsdeildinni í handbolta í kvöld.

Það var rólegt yfir Aroni Pálmarssyni í leiknum, en hann skoraði eitt mark úr eina skotinu sínu í leiknum og var það úr vítakasti.

Lokatölur í leiknum voru 19-43 fyrir Barcelona, sem var 12-21 yfir í hálfleik. Heimamenn skoruðu aðeins sjö mörk í seinni hálfleik, þar af aðeins tvö síðustu tíu mínúturnar.

Barcelona er ósigrað á toppi deildarinnar með 22 stig, fullt hús stiga, eftir 11 umferðir.