Viðbrögðin hafa rétt við bakið á þolendum Róberts Downey

„Ég er mjög ánægður með að hún sé að skoða þetta ferli. Það er byrjunin. Við höfum sagt að þetta sé undarlegt ferli. Þegar tilfelli Róberts Árna kemur upp, þar sem maður sem hefur aldrei játað en er dæmdur fær uppreist æru í gegnum ráðuneytið, þá finnst mér frábært að hún ætli að endurskoða þetta,“ segir Bergur Þór Ingólfsson, leikari og leikstjóri, um þá ákvörðum Sigríðar Andersen dómsmálaráðherra að leggja fram frumvarp í haust um fyrirhugaðar breytingar sem varða uppreist æru. Vinna við gerð frumvarpsins er þegar hafin.

Bergur Þór er faðir stúlku sem Robert Downey, áður Róbert Árni Hreiðarsson, braut á. Róbert fékk uppreist æru sem hefur vakið gremju margra og enn hafa engar upplýsingar fengist um hver það var sem mælti með að hann fengi óflekkað mannorð. Morgunblaðið greindi frá því í gær að til greina kæmi að afnema heimild stjórnvalda í hegningarlögum til að veita einstaklingum uppreist æru.

Bergur og Þröstur Leó Gunnarsson skrifuðu pistil í Fréttablaðið sem fór víða. Bergur segir að viðbrögðin hafi verið mjög jákvæð og fjölmörg á ýmsum miðlum og virkað sem hvatning á þá félaga. „Þetta hefur rétt aðeins við bakið á þolendum Róberts Árna. Það er vakning um þessi málefni því þetta er ekki rétt. Við þurfum að leiðrétta menningu okkar,“ segir Bergur.

Hann segir að það eigi ekki að vera nauðganir um hverja verslunarmannahelgi. „Þessi mál eiga ekki að fara í gegnum dómskerfið eins og þau gera og ég finn fyrir mikilli þörf fólks fyrir að leiðrétta og ræða þessi mál. Þetta gerist orðið svo oft, er svo mikið og almennt og næstum því viðtekin venja. Ég skil þetta ekki.“

Bergur segir þörf á að ræða þessi mál áfram og komast að niðurstöðu.