Fylgstu með úrhellinu á gagnvirku korti

Veðurstofan varar við mikilli úrkomu í nótt, á morgun og á fimmtudag en spáin hljóðar upp á meira en 100 millimetra á sólarhring á svæðunum frá austanverðum Vatnajökli í austri, á öllu Suðaustur-og Suðurlandi sem og norður með Vesturlandi að Ísafjarðardjúpi.

 

Í tilkynningu frá Almannavörnum vegna úrkomunnar kemur fram að jafnframt sé búið við miklu afrennsli af jöklum og megi því búast við miklum vatnavöxtum í kjölfarið. Þá er vatnsstaða víða há vegna mikillar rigningar undanfarið.

 

„Flóðahætta getur því skapast mjög víða á svæðinu strax í nótt t.d. Á vatnasviði Hvítár í Árnessýslum, við Ölfusá, og við Norðurá og Hvítá í Borgarfirði. Viðbúið er að mikið vaxi í ám og lækjum og er fólki eindregið ráðlagt frá því að reyna að fara yfir óbrúaðar ár og læki. Jafnframt má búast við aukinni hættu á skriðuföllum á þessum slóðum.

Í þéttbýli mun mikið reyna á frárennslismannvirki og því mikilvægt að þau virki sem skildi. Ráðlegt er að hreinsa vel frá niðurföllum og grípa til annarra aðgerða sem þurfa þykir.

Langvarandi úrkomuatburðir sem þessir eru mjög sjaldgæfir og aðstæður og afleiðingar því ókunnuglegar og jafnvel hættulegar,“ segir í tilkynningu Almannavarna.

Á vefsíðunni WindyTv má fylgjast með veðurspám nokkra daga fram í tímann á gagnvirku korti og má hér fyrir neðan fylgjast með slíku korti.