Leita enn göngumanns á Fimmvörðuhálsi

Björgunarsveitarmenn leita enn göngumanns sem óskaði eftir aðstoð þegar hann var í villum á Fimmvörðuhálsi.

Í tilkynningu frá Slysavarnarfélaginu Landsbjörg segir að fyrr í dag hafi maðurinn gefið Neyðarlínu og lögreglu upp gps hnit með staðsetningu sinni en þeim bar ekki saman svo ekki er vitað nákvæmlega hvar hann var staddur.

„Björgunarsveitir á Suðurlandi hafa leitað á hálsinum í dag án árangurs. Síðdegis var kallað eftir aðstoð vélsleða og snjóbíla frá björgunarsveitum í Árnessýslu og nú er verið að fá slíkan liðsauka af höfuðborgarsvæðinu. Mikið kapp er lagt á að finna manninn sem fyrst. Aðstæður á Fimmvörðuhálsi eru erfiðar; þar snjóar og skyggni er lítið sem ekkert og færi þungt,“ segir í tilkynningunni.