Leita að erlendum göngumanni á Fimmvörðuhálsi

Uppfært klukkan 14.39: Tíu björgunarsveitarmenn á þremur bílum eru nú á leið upp á Fimmvörðuháls til að aðstoða erlendan göngumann sem þar hefur villst af leið.

Þorsteinn Jónsson er einn björgunarsveitarmanna en að hans sögn eru þeir með þrjá vélsleða og stefna á að reyna að komast til mannsins þannig.

Aðspurður um færð og aðstæður segir hann ekki halda að það sé mjög slæmt veður uppi á hálsinum en mikil þoka sé á svæðinu.

„Það er búið að prófa að fljúga þarna yfir en það sést ekki neitt,“ segir Þorsteinn.

Hann segir að ef vel gangi þá muni björgunarsveitarmenn komast til mannsins eftir um klukkutíma. 

Björgunarsveitir á Suðurlandi hafa verið kallaðar út til leitar að göngumanni á Fimmvörðuhálsi. Um er að ræða erlendan ferðamann sem ætlaði að ganga hálsinn en hringdi eftir aðstoð þegar hann villtist af leið.

Samkvæmt upplýsingum frá manninum er hann líklegast staddur norðan við Baldvinsskála. Ekkert amar að manninum að því er fram kemur í tilkynningu frá Landsbjörg en þoka er á svæðinu og lítið skyggni. Mun maðurinn því halda kyrru fyrir þar til aðstoð berst.