Sjómenn og SFS loks búin að semja

Nýr kjarasamningur Sjómannasambands íslands og Samtaka fyrirtækja í sjávarútvegi var undirritaður fyrr í dag, en sjómenn hafa verið samningslausir frá ársbyrjun 2011.

Á Facebook-síðu SSÍ segir að kjarasamningurinn sé framlenging af núgildandi samningi með þeim breytingum að kauptrygging hækki frá 1. júní um 23 prósent og verði 288 þúsund krónur. Í samningslok í árslok 2018 verði kauptryggingin 310 þúsund krónur en aðrir kaupliðir hækka um 17,1 prósent á samningstímanum.

Fram kemur að vilji sé hjá fjármálaráðherra að hluti fæðispeninga sjómanna verði skattfrjálsir og svo er bókun sem fylgi samningnum um athugun á mönnun fiskiskipa og hvíldartíma íslenskra sjómanna sem Jón Bernódusson hjá Samgöngustofu mun hafa forgöngu um.

„Einnig er bókun um endurritun samningsins alls fyrir lok samningstímans. Ríkissáttasemjari mun stýra þeirri vinnu ef samningurinn verður samþykktur,“ segir í færslunni samningurinn verður kynntur næstu vikur úti í félögunum.

Atkvæðagreiðsla mun hefjast í næstu eða þarnæstu viku og mun ljúka þann 8. ágúst.