Kolefnishlutlaus Reykjavík árið 2040

Reykjavíkurborg setur sér það markmið að verða kolefnishlutlaus borg árið 2040, samkvæmt drögum að uppfærðri loftslagsstefnu. Horft er til Parísarsamkomulagsins í loftslagsmálum um framkvæmd. Þessu metnaðarfulla markmiði fylgja miklar breytingar, ekki síst í samgöngum sem er helsta matarholan til að árangri, samkvæmt stefnunni.

Drögin voru til umræðu í borgarstjórn á miðvikudag. Þau eru unnin í þverpólitískri sátt en stýrihópinn sem vann að málinu skipuðu oddvitar allra flokka í borgarstjórn undir formennsku Dags B. Eggertssonar borgarstjóra, auk aðkomu fulltrúa umhverfis- og skipulagsráðs og embættis- og starfsmanna borgarinnar.

Stefnan sem nú er sett fram er í tveimur hlutum; lýtur að samfélaginu í Reykjavíkurborg, íbúum og atvinnulífi annars vegar, og hins vegar sérstaklega að rekstri Reykjavíkurborgar – bílaflota, vinnustöðum borgarinnar og skráningu upplýsinga. Stefnt er að kolefnishlutleysi í báðum tilfellum – báðum hlutum stefnunnar fylgir aðgerðalisti til ársins 2020. Í anda Parísarsamkomulagsins er gert ráð fyrir endurskoðun aðgerða á fimm ára fresti. Árangur verður mældur á tveggja ára fresti miðað við stöðuna árið 2015.

Fyrir liggur, ólíkt borgarsamfélögum víða annars staðar, að allt rafmagn og öll húshitun Reykjavíkurborgar er fengin með sjálfbærri grænni orku. Þess vegna er lögð sérstök áhersla á samgönguþáttinn í drögunum – sem er stærsta áskorun borgarinnar.

Stefna um kolefnishlutleysi felur í sér áfram að megináherslan verður á að draga úr losun – en það var megináherslan í stefnunni sem borgin setti sér árið 2009. Ólíkt því sem nú er voru ekki nein áform um að binda þá losun sem ekki verður hægt að draga úr. Til að svara því, í stefnu sem gerir ráð fyrir kolefnishlutleysi, þarf því að binda kolefni með skógrækt, ræktun votlendis og kolefnisbindingu í jörð.

Fréttablaðið fjallaði á dögunum um mikilvægi þéttbýlis í ljósi loftslagsbaráttunnar. Vel á þriðja hundrað borgir, sem finna má í öllum heimsálfum, með um 440 milljónir íbúa hafa sett sér loftslagsmarkmið.

Dagur B. Eggertsson borgarstjóri segir að það hafi verið hans tilfinning í umræðunum í París að borgir séu ekki síður hluti af lausninni en vandanum í loftslagsmálum.

„Þessar tillögur taka mjög mið af því. Skipulagsmál og samgöngumálin eru lykilatriði, auk góðrar samvinnu við atvinnulífið og íbúana. Við höfum í þessari vinnu stuðst við þekkingu sérfræðinga innanlands og horft til þeirrar stefnu, markmiða og aðgerða sem framsæknar borgir hafa verið að setja fram í aðdraganda og eftir Parísarfundinn,“ segir Dagur.



Fréttin birtist fyrst í Fréttablaðinu 23. júní 2016