Blanda yfir 300 laxa og frábært í Norðurá

Landssamband veiðifélaga birti í gær fyrstu tölur sumarsins úr laxveiðinni, og á þeim tíu árum sem LV hefur safnað saman vikulegum tölum úr þeim 25 ám sem fylgt er eftir allt sumarið hafa aðrar eins tölur vart, eða alls ekki, sést.

Blanda hafði gefið 302 laxa á miðvikudagskvöldið, sem er margfalt meiri veiði sé miðað við svipaðan tíma í fyrra en þá var búið að veiða 59 laxa. Veiði hefur einnig farið vel af stað í Norðurá en á hádegi miðvikudags var búið að veiða 213 laxa. Veiðin í Norðurá var 65 laxar á svipuðum tíma í fyrra. Veiðin í Þverá og Kjarará byrjar jafnframt mjög vel og er veiðin 162 laxar samanborið við 62 laxa á svipuðum tíma í fyrra, segir í frétt LV.

Veiði hófst í Miðfjarðará í gær og gekk vel en 31 lax veiddist. Fnjóská opnaði á þriðjudag og komu sex laxar á opnunardag, sem er mjög lofandi um framhaldið. Segir að veiðimenn séu á einu máli um að laxar koma mjög vel haldnir úr hafi og beri með sér að nóg hafi verið að bíta og brenna fyrir laxinn.

Á næstu dögum og vikum opna fleiri ár og verður áhugavert að fylgjast með. Það er fullsnemmt að spá fyrir um þróun mála enda fjölmargt sem getur haft áhrif á veiði. En vonandi gefur þessi veiði í upphafi veiðitímabils góð fyrirheit um það sem koma skal en bæði heimtur úr hafi og ástand laxa gefa tilefni til bjartsýni.