Leikmaður sakaður um veðmálasvindl án vitundar KSÍ

Slóvenskur knattspyrnumaður sem leikið hefur með þremur íslenskum liðum á síðustu níu árum hefur verið til rannsóknar slóvensku lögreglunnar vegna gruns um veðmálasvindl og að hagræða úrslitum leikja. Leikmaðurinn er nú farinn af landi brott og síðast er vitað af honum í Kanada. KSÍ vissi ekkert um rannsókn málsins ytra þrátt fyrir að net heilindafulltrúa knattspyrnusambanda eigi að miðla upplýsingum sín á milli.

Janez Vrenko, slóvenskur ríkisborgari, kom hingað til lands fyrst árið 2007 og lék með KA á Akureyri. á ferli sínum hér á landi lék hann lengst af með Þór á Akureyri en einnig lék hann undir hið síðasta með Dalvík/Reyni. Janes flutti af landi brott í vetur en síðast er vitað um ferðir hans í Kanada. Janes hefur ekki enn gefið skýrslu fyrir lögreglu í Slóveníu samkvæmt heimildum frá slóvensku lögreglunni.

Þorvaldur Ingimundarson er heilindafulltrúi KSÍ og sér um samskipti við knattspyrnusamband Evrópu og FIFA varðandi þessi mál. Hann hafði ekki heyrt af þessu máli þegar fréttamaður náði tali af honum. „Þetta mál hefur ekki komið til okkar og við höfum engar ábendingar fengið um þetta. Heilindafulltrúar halda ákveðið net til að auðvelda samskipti sín á milli en þetta mál hefur ekki komið á mitt borð,“ segir Þorvaldur. „Það hafa komið upp nokkur tilvik á síðustu árum þar sem við höfum verið upplýst um mögulega rannsókn en enn sem komið er hefur ekkert alvarlegt komið upp á hér á landi.“

Veðjað er á leiki íslenskra liða úti um allan heim í dag og er á mörgum stöðum einnig hægt að veðja á úrslit knattspyrnuleikja í öðrum flokki. Veðjað er um milljarða króna á hvern leik í Pepsideild karla og því er um miklar upphæðir að ræða og freistnivandi knattspyrnumanna því umtalsverður.