Sjö gestir Secret Solstice fluttir á sjúkrahús: Fjórir sjúkrabílar á sama tíma þegar mest var

Tónlistarhátíðin Secret Solstice var sett í Laugardalnum í Reykjavík í gærkvöldi og skemmtu sér margir konunglega. Töluverður fjöldi er þar saman kominn en samkvæmt upplýsingum frá slökkviliði höfuðborgarsvæðisins var talsverður erill hjá sjúkraflutningamönnum í kringum hátíðina í gær og í nótt. Á tímabili voru fjórir sjúkrabílar á svæðinu á sama tíma að sinna gestum hátíðarinnar.

Alls fóru sjúkraflutningamenn í sjö útköll vegna jafn margra einstaklinga frá klukkan ellefu í gærkvöldi til þrjú í nótt. Að sögn slökkviliðsins var þar um að ræða gesti sem höfðu farið óvarlega með áfengi, fengið höfuðhögg vegna falls, einn var fluttur á sjúkrahús vegna neyslu og einnig gestir fluttir á sjúkrahús eftir slagsmál.