Össur líkir ríkisstjórninni við tragíkómískan farsa

Össur Skarphéðinsson, þingmaður Samfylkingarinnar, segir í færslu á Facebook-síðu sinni að ríkisstjórn Íslands sé „eiginleg orðin að tragíkómískum farsa.“

Eins og kunnugt er hefur Sigmundur Davíð Gunnlaugsson, forsætisráðherra, að segja af sér og lagt til að Sigurður Ingi Jóhannsson, varaformaður Framsóknarflokksins, verði næsti forsætisráðherra. Sigurður Ingi og Bjarni Benediktsson, fjármálaráðherra, ræða nú næstu skref en fullur vilji er hjá báðum stjórnarflokkunum að halda áfram ríkisstjórnarsamstarfinu.

Að mati Össurar er landið í reynd stjórnlaust:

„Það veit enginn hvort það er yfirhöfuð ríkisstjórn í landinu eða hvort hún styðst við meirihluta. Fjölmiðlar segja fréttir af því að enginn ráðherra sé mættur í forsætisráðuneytinu. - Fundir í ríkisstjórn falla niður. Landið er í reynd stjórnlaust. Jafnvel á Alþingi ríkir stjórnleysi að því marki að engir fundir eru haldnir því næsta mál á dagskrá er tillaga um vantraust og fráfarandi stjórnarflokkar vita ekki sitt rjúkandi ráð um hvernig þeir eiga að hantéra hana.“

Þá segir Össur að Sigmundur Davíð vilji ekki hætta „og hangir á tám og nöglum á embættinu. Svo sendir hann í skjóli kveldrökkurs út tilkynningar til erlendra miðla um að ef hann hætti, þá hætti hann bara til bráðabirgða. Nú bendir allt til að fyrir honum hafi einungis vakað að flytja sig yfir í aftursætið og gerast baksætisbílstjóri.

Á meðan veit enginn hvort það er forsætisráðherra í landinu eða hver það er. – Þetta er djúp stjórnskipunarkreppa. Í annað sinn á einni viku rýrir ríkisstjórn Íslands orðspor þjóðarinnar. Í stjórnskipaninni er sem betur fer öryggisventill einsog við vorum minnt á í gær. Þennan leik þarf að skakka.“

Greint hefur verið frá því að Sigmundur Davíð og Sigurður Ingi hafi átt fund í stjórnarráðinu í dag en ekki liggur fyrir hvað fór fram á þeim fundi.

Þennan leik þarf að skakkaRíkisstjórn Íslands er eiginlega orðin að tragíkómískum farsa. Það veit enginn hvort það er...

Posted by Össur Skarphéðinsson on Wednesday, 6 April 2016