Dagsektarmálum fjölgað um 63 prósent

Dagsektum er beitt þegar foreldrið sem barnið býr hjá hamlar hinu foreldrinu umgengni. Það foreldri sækir þá um að beitt verði dagsektum til að knýja fram umgengni.

Árið 2010 voru nítján dagsektarmál á borði Sýslumannsins í Reykjavík en þau voru 31 fjórum árum síðar. Árið 2015 voru fimmtíu mál á borði sýslumannsins en sú tala á við um allt höfuðborgarsvæðið enda voru embættin sameinuð það ár. Mál vegna dagsekta sem eru til meðferðar í dag eru 27 talsins.

Eyrún Guðmundsdóttir, sviðsstjóri fjölskyldusviðs hjá Sýslumanninum á höfuðborgarsvæðinu, segir alltaf reynt að ná sáttum með öðrum leiðum áður en dagsektum er beitt.

„Þegar lögð er inn beiðni um dagsektir þá er aðilum boðin sáttarmeðferð þar sem farið er yfir ágreininginn og reynt að finna leiðir til að koma málinu í betra horf.“

Ef sáttarmeðferð gengur ekki eru reynd ýmis önnur úrræði, til að mynda að sérfræðingur sé viðstaddur umgengni og hitti foreldra og barn. Ef enn gengur ekki að ná samkomulagi er kveðinn upp úrskurður um málið, hvort beitt verði dagsektum eða ekki.

Í fréttum Stöðvar 2 kom nýverið fram að feður séu þolendur í um 85 prósentum svokallaðra tálmunarmála, eða þegar foreldri hindrar umgengni, og því yfirleitt karlmenn sem leggja inn beiðni um dagsektir. Bragi Guðbrandsson, forstjóri Barnaverndarstofu, sagði í viðtali að stundum væri um tilfinningalegt ofbeldi að ræða gagnvart börnunum sem þau gætu borið mikinn skaða af.

Eyrún tekur undir að harkan hafi aukist í deilum foreldrum vegna barna. Fleiri beiðnir um dagsektir séu merki um það en þótt beiðnunum fjölgi eru úrskurðirnir sem kvaddir eru upp af sýslumanni ekki mjög margir. „Stundum er verið að biðja um að beita dagsektum af óverulegu tilefni og málinu lýkur fljótt eða það lognast út af. Í öðrum tilfellum næst samkomulag. Það eru mjög mismunandi atvik að baki og mjög mismunandi alvarleg. Enda er hlutverk dagsekta að knýja á um umgengni en ekki bókstaflega að sekta fólk.“