Bam Margera mættur til að gefa skýrslu vegna árásarinnar á Secret Solstice

Bandaríski tónlistarmaðurinn og Jackass-meðlimurinn Bam Marger mætti til landsins í dag til að gefa skýrslu hjá lögreglu vegna árásar sem hann varð fyrir á tónlistarhátíðinni Secret Solstice í fyrra. Greint var fyrst frá komu Margera til landsins á DV.is. 

Málið vakti gífurlega athygli en myndband náðist af því þegar rappararnir Gísli Pálmi og Tiny, Gísli Pálmi Sigurðsson og Egill Ólafur Thorarensen, veittust að Margera laugardaginn 20. júní í fyrra þegar tónlistarhátíðin Secret Solstice stóð sem hæst í Laugardalnum. Átti árásin sér stað í framleiðsluherbergi sem sett hafði verið upp í Þróttaraheimilinu.

Forsvarsmenn Secret Solstice sögðu Bam Margera hafa áreitt tvær konur sem sinntu öryggisgæslu á svæðinu og að þeir sem réðust á hann hefðu verið að koma þeim til bjargar. Margera neitaði því, sagðist hafa verið ákveðinn við konurnar en ekki áreitt þær. Hann sagðist hafa viljað ná tali af einum af starfsmönnum hátíðarinnar, umboðsmanninum Leon Hill, sem Margera vildi meina að skuldaði sér og hljómsveit sinni The Earth Rocker pening.

Sjá einnig: Þverneitar fyrir að hafa áreitt starfsfólk

Lögmaður Margera er Sveinn Andri Sveinsson en hann segir lögregla hafa átt eftir að taka formlega skýrslu af honum. Hann sagðist hafa mál Margera að sér fljótlega eftir atvikið kom upp. Margera fór eftirminnilega af landi brott í fyrra án þess að gefa skýrslu því honum leiddist biðin eftir lögreglu.

Sveinn Andri segir Margera hafa hitt sérfræðinga í Bandaríkjunum vegna áverka sem hann hlaut eftir árásina. Sveinn segir að ákveðið hafi verið að láta íslenska sérfræðinga skoða Margera og munu þeir skila læknisvottorði til lögreglu.

Sveinn Andri segir að kvarnast hafi upp úr kinnbeini Margera, rétt undir auganu. Þá hlaut hann þungt högg á vinstra augað og er jafnvel hætta á að hann hafi hlotið varanlegan skaða á auga.

„Maður hefur séð ýmislegt í gegnum tíðina en málsatvikin eru eins augljós og hugsast getur. Þarna er hópur manna sem veitir honum áverka með þremur höggum,“ segir Sveinn Andri. 

Hann segir Margera hafa kært árásina til lögreglu en það sé undir henni komið hverjir séu sakborningar málsins. Hann segir lögregluna með allar upptökur undir höndum frá þessu atviki og það hafi í raun legið ljóst fyrir frá byrjun hverjir væru sakborningar í málinu. Samkvæmt kærunni sakar Margera þá Gísla Pálma og Tiny um árásina ásamt þriðja manni. 

Sveinn Andri  segir formlega bótakröfu verða lagða fram þegar öll læknisvottorð eru komin fram en segir óljóst á þessari stundu hvort gerð verði bótakrafa á Secret Solstice-hátíðina þar sem ekki sé enn komið á hreint hvort þeir sem grunaðir eru um árásina hafi verið starfsmenn hennar. 

Hann segir Bam Margera líkast til fara af landi brott á morgun.