Loksins sigur hjá Róberti og félögum

Íslendingarliðið Århus GF fagnaði langþráðum sigri í danska handboltanum í kvöld.

Århus GF vann þá þriggja marka útisigur á Team Esbjerg, 28-25, en þetta var lokaleikur fimmtu umferðarinnar.

Århus GF var búið að tapa fjórum fyrstu leikjum sínum á mótinu og var fyrir þennan leik aðeins annað af tveimur stigalausum liðum dönsku úrvalsdeildarinnar.

Róbert Gunnarsson var markahæstur í liði Århus GF með sex mörk en Anders Martinusen skoraði jafnmikið og íslenska landsliðslínumaðurinn. Róbert nýtti öll skotin sín í leiknum.

Ómar Ingi Magnússon klikkaði á báðum skotum sínum í leiknum og tapaði þremur boltum. Hann átti hinsvegar eina stoðsendingu.

Róbert og Ómar Ingi eru báðir á sínu fyrsta tímabili með Århus GF. Ómar Ingi kom þangað frá Val en Róbert er að snúa aftur til Århus GF eftir meira en ellefu ára fjarveru.