Mál á hendur Gunnari í Krossinum fellt niður

Kæra vegna fjármálamisferlis á hendur Gunnari Þorsteinssyni, oftast kenndur við Krossinn, hefur verið felld niður.

Stjórn áfangaheimilisins Krossgatna sendi erindi til embættis sérstaks saksóknara í mars 2014 þar sem þess var óskað að fram færi opinber rannsókn á fjármálum og bókhaldi Krossgatna á árunum 2008 til 2002 og viðskiptum við tengda aðila.

Á ekki orð til að lýsa þakklæti sínu

Gunnar segist í tilkynningu ekki eiga orð til að lýsa þakklæti sínu, en á sama tíma undrist hann hvernig hægt sé að búa til mál af þessu tagi, sem sé forsendulaust og fari með himinskautum í fjölmiðlum með það markmið að gera atlögu að æru manns.

„Þeir sem reiddu hátt til höggs sitja uppi með þessa ósvinnu,“ segir Gunnar.

Hlaut réttarstöðu sakbornings

Í erindi stjórnar Krossgatna sagði að hún hefði fengið óháðan aðila til að annast frumúttekt á bókhaldi og að sú skýrsla hafi gefið tilefni til að málið yrði skoðað nánar af hálfu hins opinberra.

Gunnar hlaut réttarstöðu sakbornings og var yfirheyrður í byrjun desember síðastliðinn.

Í bréfi héraðssaksóknara til Gunnars, sem dagsett er 10. mars, kemur fram að rannsókn sé nú lokið og að mati ákæruvalds teljist það sem fram hafi komið ekki nægjanlegt eða líklegt til sakfellis og hafi málið því verið fellt niður.

Vildi láta kanna hvort stofnunin hafi greitt kostnað við skilnað Gunnars

Í bréfinu segir jafnframt að í erindi stjórnar Krossgatna hafi verið „rakin nokkur dæmi um ýmsa lausafjármuni á borð við þvottavélar, kæliskápa, þurrkara, sjónvörp og fleiri heimilistæki sem hafi verið keypt og hafi ekki skilað sér til sjálfseignarstofnunarinnar að því er stjórnin best viti.“

Stjórnin vildi einnig láta kanna hvort sjálfseignarstofnunin hafi að einhverju leyti greitt kostnað við skilnað Gunnars og eldsneytisúttektir Gunnars og „skyldra aðila, viðskipti með bifreiðir o.fl.“

Kærandi getur borið ákvörðunina um niðurfellingu málsins undir embætti ríkissaksóknara innan eins mánaðar.