Náðu neyðarsendinum úr brimhvítu hafrótinu

„Neyðarsendirinn fer í gang um leið og hann snertir sjóinn. Við fundum hann þrátt fyrir hafrótið því merkið sem kemur frá sendinum er mjög nákvæmt,“ segir Sigurður Ásgeirsson, þyrluflugstjóri hjá Landhelgisgæslunni, en áhöfn hans fór að Selatanga, rétt hjá Grindavík, til að sækja neyðarsendi sem þar var í gangi.

Áhöfnin sá brátt ljóstýru frá neyðarsendinum og seig Teitur Gunnarsson sigmaður niður eftir honum. Komið hefur í ljós að sendirinn var af erlendri skútu, Red Heol, sem ætlaði að koma til Asoreyja 16. júlí í sumar. Einn maður var um borð en líklega varð hann bráðkvaddur um borð og hefur skútuna rekið um hafið. Líkið af manninum fannst svo daginn eftir.

„Neyðarsendirinn gefur út ótrúlega nákvæmt merki og hver sé skráður eigandi. Við fljúgum þannig lagað séð beint á hann og notumst við sérstakar miðunargræjur til að sjá hann nákvæmlega. Tilkynningin kom um fimm leytið um nóttina og við notuðumst við nætursjónauka. Neyðarsendirinn er með litlu ljósi sem nætursjónaukinn magnar mjög mikið upp. Þannig lagað séð var þetta lítið mál,“ segir Sigurður hógvær. Skútan hafði brotnað í spón þegar hana rak upp á klettana og dreifðist hún víða um fjörurnar.

„Við vildum ekki að sendirinn væri í gangi því hann gæti truflað önnur merki þannig það þurfti að sækja hann og slökkva á honum.“

Neyðarsendirinn er ekki miklu stærri en epli að sögn Sigurðar og hægt er að fá enn minni sendi sem gæti nýst fólki í vanda. „Það er hægt að fá svona neyðarsenda fyrir fólk og þetta er mjög sniðug græja eins og til dæmis fyrir rjúpnaskyttur. Þetta sparar tíma við leit því staðsetningin sem hann sendir er svo nákvæm. Ef fólk er að verða úti eða drukkna eða hvað sem er þá þarf ekki að leita lengi og gætu þeir bjargað mannslífum. Þeir eru með litlu ljósi og við sjáum ljós langt frá.“

Fréttin birtist fyrst í Fréttablaðinu