„Mín túlkun er að Dagur hætti“

Dagur Sigurðsson gæti hætt sem þjálfari þýska landsliðsins í handbolta eins og fjallað hefur verið um í vikunni.

Dagur er samningsbundinn til 2020 en uppsagnarákvæði er í samningnum sem hann getur nýtt sér í sumar.

„Eins og ég túlka það sem hefur verið sagt þá tel ég að það sé ákveðið að Dagur muni hætta,“ sagði Daniel Stephan í viðtali við þýska fjölmiðla um málið.

Stephan spilaði með þýska landsliðinu um árabil og vann silfurverðlaun með liðinu á Ólympíuleikunum í Aþenu 2004.

Sjá einnig: Tvö af stærstu liðum heims vilja fá Dag

„Það væri mikil synd því hann ber ábyrgð á þessum mikla uppgangi þýska landsliðsins. Þetta væri mikill missir en landsliðið heldur áfram án hans.“

Þjóðverjar hafa sett sér það markmið að vinna gull á Ólympíuleikunum í Tókýó 2020 en samningur Dags gildir fram yfir þá leika.

„Það verður samt að reyna að ná settum markmiðum en það verður án nokkurs vafa erfiðar án hans.“