Málar myndir af Davíð og Ólafi Ragnari með skaufa sínum

Axel Diego myndlistarmaður, sem kemur fram undir listamannsnafninu Perró, fer afar óhefðbundnar leiðir í listsköpun sinni. Hann sem sagt notar skaufa sinn sem pensil, og er nakin við að fullgera verk sín. Viðfangsefnin eru hins vegar öllu hefðbundnari en hann málar myndir af þekktum Íslendingum og meðal þeirra sem Axel hefur gert myndir af eru Davíð Oddsson, Ólafur Ragnar Grímsson, forsetafrúin og Gylfi Ægisson svo einhverjir séu nefndir.

Axel er í ítarlegu viðtali við vefmiðilinn gayiceland.is, og þar segir hann undan og ofan af verkum sínum og aðferðum. Kveikjan að myndinni af Gylfa, sem máluð var í fyrra er til að mynda beint úr samfélagsumræðunni sem þá var ríkjandi: „Já, Gylfi Ægis og tippasleikjóarnir voru mjög í deiglunni þá,“ segir Axel Diego og flissar í viðtali við GayIceland.

Þar kemur jafnframt fram að einn sem tekinn hefur verið þessum efnistökum, að hafa verið málaður með typpi Perrós, er Elliði Vignisson bæjarstjóri úti í Vestmannaeyjum. Sú mynd mun nú hanga á bæjarstjóraskrifstofunni úti í Eyjum, sem blaðamanni og viðmælanda hans þykir öfugsnúið og kostulegt í raun. Því eftir að myndin var máluð vann Elliði sér það til óyndis að vera talinn einn þeirra sem einarðast vill ganga fram í að lækka framlög ríkis til lista og menningar. Myndin var máluð á sérstakri sýningu í Vestmannaeyjum og var það að ósk áhorfenda sem Elliði var tekinn þessum tökum, en það munaði þó litlu að Árni Johnsen yrði málaður með þessum hætti.

Í viðtalinu á GayIceland kemur meðal annars fram að listamannsnafn Axels Diego, Perró, er ekki hugsuð sem útlegging á listamannsnafni annars og eilítið frægari myndlistarmanns, nefnilega Erró, heldur mun nafnið vísa til orðsins pervert.