Sjö manna fjölskylda ákvað að hætta fatakaupum í heilt ár

Fimm barna móðir, sem ákvað að hætta að kaupa föt á fjölskyldumeðlimi í heilt ár, segir engan fataskort hafa verið á heimilinu þó þar séu börn sem vaxi hratt. Í stað þess að kaupa alltaf nýtt sé hægt að nýta betur það sem til er.

Sigrún Harpa Wahlgren býr í Fossvogi ásamt manni sínum og fimm börnum, sem eru á aldrinum tíu mánaða til sautján ára. Síðustu áramót strengdi hún áramótaheit um að kaupa ekki föt á fjölskyldumeðlimi út árið. 

„Fyrst og fremst var þetta kannski vegna þess að ég vildi kenna börnunum mínum meira að meta það sem þau eiga. Mér fannst þau bara eiga of mikið. Ef ég keypti eitthvað þá bættist það bara í hrúguna inni í skáp og þau tóku varla eftir því,“ segir Sigrún.

Enginn fataskortur hefur verið á heimilinu þó þar séu börn sem vaxi hratt. Allir taka þátt í verkefninu saman.

„Okkur hefur ekkert vantað neitt þetta ár. Nema þá kannski aðeins á þenna litla sem var bara fjögurra mánaða þegar við byrjuðum á þessu. Og þá höfum við keypt bara það sem er algjörlega nauðsynlegt. Og það er mjög lítið,“ segir Sigrún. 

Hún ákvað líka að endurnýta þær flíkur sem til eru á heimilinu en hafa ekki verið notaðar í mörg ár. Þá kemur sér vel að vera lunkinn á saumavélina. Sigrún saumar meðal annars kjóla á dætur sínar úr skyrtum fjölskylduföðursins og húfur og vesti úr gallabuxum, ásamt því að breyta og bæta gamla jakka sem leyndust inni í skáp. Afrakstrinum deilir hún á Instagram og á bloggsíðu sinni – Remade in Iceland. 

Ljóst er að fjölskyldan kemur ekki til með að detta aftur í fyrra neyslumynstur.

„Ég hugsa að þetta áhugamál, að fara í búðir og kaupa eitthvað sem vantar ekki, sé bara alveg liðið undir lok. Ég held að það sé bara nauðsynlegt að allir hugsi aðeins málið ef að við ætlum ekki að búa til svona mikið rusl. Það þarf ekki að hætta að kaupa, bara kaupa minna,“ segir Sigrún Harpa Wahlgren.