Færri njóta fjárhagsaðstoðar Reykjavíkurborgar til framfærslu en í fyrra

Heildarútgjöld Reykjavíkurborgar til fjárhagsaðstoðar lækkuðu um ríflega 20 prósent á fyrstu þremur mánuðum ársins vegna fækkunar notendum fjárhagsaðstoðar til framfærslu. Notendur voru tæpum 24 prósentum færri á fyrstu þremur mánuðum ársins heldur en á fyrstu þremur mánuðum síðasta árs. Þetta kemur fram í tilkynningu frá Reykjavíkurborg.

Þannig voru 1469 manns sem þáðu fjárhagsaðstoð til framfærslu á fyrstu þremur mánuðum ársins miðað við 1924 í fyrra.

„Á síðustu árum hefur verið gripið til fjölbreytilegra ráðstafana til að auka þjónustu við þá sem fá fjárhagsaðstoð til framfærslu, einkum þá sem eru atvinnulausir eða sjúklingar. Ráðstafanir þessar eru ýmist alfarið á hendi velferðarsviðs eða í samstarfi við aðrar stofnanir.  Má þar nefna að virkniráðgjafar voru ráðnir í upphafi árs 2010 til starfa á þjónustumiðstöðvum, Atvinnutorg opnaði í febrúar 2012, Stígur, þjónusta við atvinnuleitendur, var stofnaður í mars 2014, atvinnumáladeild var stofnuð hjá Reykjavíkurborg árið 2012, færniteymi með þjónustu fyrir óvinnufæra og matsteymið Velvirk hófu starfsemi árið 2014. Þá hefur verið lögð sérstök áhersla á þjónustu við ungt fólk og þá sem ljúka bótarétti sínum hjá Vinnumálastofnun,“ segir í tilkynningu.

Þá kemur fram að þær aðgerðir sem gripið hefur verið til þess að fækka notendum fjárhagsaðstoðar byggi á virku samráði og þátttöku notenda.

„Áhersla er á valdeflingu með það að leiðarljósi að einstaklingurinn taki ábyrgð á eigin lífi og geti séð sér og sínum farborða án aðkomu sveitarfélagsins.“

Borgarstjórn mun fjalla sérstaklega um þetta á næsta fundi sínum á morgun.