Göngumaðurinn týndur í sólarhring: Skyggni slæmt og vísbendingar fáar

Ekkert bólar á göngumanni sem varð viðskila við samferðafólk sitt í gærdag við Sveifluháls norðan Kleifarvatns. Rúmlega hundrað manna hópur leitar að manninum og er leitin umfangsmikil. Notast er við dróna, þyrlu og fjórhjól meðal annars. Þó er skyggni ansi slæmt en mikil þoka liggur yfir svæðinu auk þess sem rignir á mannskapinn.

„Það liggur mikið við. Veðrið hefur verið vont undanfarið,“ útskýrir Frímann Grímsson, sem er einn leitaraðila á svæðinu. Viðtal við Frímann má sjá hér að ofan.

Sjá einnig: Leita göngumanns á Suðurnesjum

„Þegar maðurinn yfirgefur hópinn, þau eru þrjú saman, þá er hann um fjörutíu mínútum á undan, eitthvað svoleiðis og ætlaði að labba að Djúpavatni. Félagarnir komu á eftir honum. Þau finna hann ekki, sjá hann hvergi og þau ákveða því að gista hjá Djúpavatni um nóttina. Hann kemur ekki fram, þau gista á áberandi stað en hann lætur ekki sjá sig.“ 

Sjá einnig: Lögregla lýsir eftir göngumanninum

Leitarsvæðið er erfitt en þar er móberg, fjöll og mikið um vötn og tjarnir. Þá er víða bratt. Jónas Guðmundsson, upplýsingafulltrúi Landsbjargar, segir að leitað verði þar til annað verður ákveðið. 

Ein vísbending hefur borist leitarteymi en annars verður teymið að leita á ansi stóru svæði. Jónas segir einn gönguhóp hafa snúið við í dag vegna slæms veðurs. Þá tekur þyrla þátt í björgunaraðgerðum en sem fyrr segir er skyggni slæmt og erfitt að greina nokkuð á jörðu niðri.

Uppfært kl. 21.45:

Lögregla lýsti í kvöld eftir manninum en hann heitir Colin Smith og er 58 ára gamall.