Starfsfólk leikskóla barnsins fann bílinn við Krónuna í Kórahverfi

Búið er að handtaka mann sem stal bíl með tveggja ára barni við leikskóla í Rjúpnasölum klukkan 15:18 í dag. Maðurinn hefur komið við sögu lögreglu áður og tengist hann ekki fjölskyldu barnsins á neinn hátt.

Bílnum var stolið á meðan faðir barnsins fór inn á leikskólann að sækja eldra barn sitt en þegar hann kom út var bíllinn horfinn. Barnið sem beðið hafði í bílnum hafði verið í aðlögun á leikskólanum fyrr um daginn.

„Hann keyrir upp að Krónunni í Kórahverfinu og fer þar inn að versla. Þar á bílaplaninu finnst bíllinn en það er starfsfólk leikskólans sem sér bílinn við verslunina og hringir á okkur,“ segir Gunnar Hilmarsson aðalvarðstjóri hjá lögreglunni á höfuðborgarsvæðinu í samtali við Vísi.

Barnið var sem betur fer heilt á húfi en talið er að það hafi verið sofandi á meðan á öllu þessu stóð. Maðurinn var handtekinn skömmu eftir að bíllinn fannst.

Aðspurður hvernig foreldrum barnsins hafi liðið segir Gunnar að þeim hafi að sjálfsögðu verið mjög brugðið.

„Og það var í raun öllum mjög brugðið. Það er ekki á hverjum degi sem þetta gerist, sem betur fer, og það fór allt tiltækt lið af stað auk þess sem þyrla Landhelgisgæslunnar aðstoðaði við leitina,“ segir Gunnar.