Ásakanir um óheilindi ganga á víxl í Eyjum

„Ótrúlega illa staðið að þessu öllu saman og að mínu mati alls ekki í samræmi við starfsreglur,“ segir í bókun sem Georg Eiður Arnarson, fulltrúi Eyjalistans, lagði fram í Framkvæmda- og hafnarráði Vestmannaeyja þegar ráðning nýs slökkviliðsstjóra var kynnt þar á miðvikudaginn.

Friðrik Páll Arnfinnsson eldvarnaeftirlitsmaður var ráðinn sem slökkviliðsstjóri. Skipulagi var samhliða breytt til fyrra horfs þannig að starfssvið eldvarnaeftirlitsmanns var sameinað hlutverki slökkviliðsstjóra.

„Að mínu mati hefði átt að bjóða varaslökkviliðsstjóra stöðuna, enda starfað yfir 40 ár í slökkviliðinu og hafði svo sannarlega áhuga á starfinu. Að öðru leyti hefði átt að auglýsa stöðuna, en þar sem fyrir liggur ráðning á Friðriki Páli Arnfinnssyni, þá vil ég fyrir hönd okkar á Eyjalistanum óska honum til hamingju með starfið og óska honum alls hins besta í framtíðinni,“ segir í bókun Georgs Eiðs.

„Ef fulltrúi E-listans er ósáttur við þá verkferla sem unnið er eftir af starfsmönnum Vestmannaeyjabæjar er honum bent á að fara rétta leið til þess að ná fram breytingum á þeim verkferlum, frekar en að ráðast að starfsmönnum bæjarfélagsins í pólitískum tilgangi,“ bókuðu fulltrúar meirihluta Sjálfstæðisflokks í framkvæmdaráðinu.

Þá gagnrýndu sjálfstæðismennirnir einnig Eið Georg harðlega í sérstakri bókun undir liðnum „Verklag og siðareglur kjörinna fulltrúa í Framkvæmda- og hafnarráði“. Sögðu þeir hann hafa veist ómaklega að starfsmönnum bæjarins með ummælum sem krefjist frekari skýringar. Þá var farið yfir meðferð tillagna sem Georg Eiður hefur sett fram í ráðinu.

„Fulltrúinn hefur haft mörg orð um „hirð“ bæjarstjórans og að hans stefna sé að koma einhverjum úr hirðinni inn í allar stjórnir og allar stofnanir á vegum bæjarins,“ segir í bókuninni. Elliði Vignisson er bæjarstjóri. „Að halda því fram að fulltrúar í ráðum og nefndum á vegum bæjarins beri ekki hagsmuni bæjarbúa fyrir brjósti, heldur gangi þar erinda eins manns eru alvarlegar ásakanir sem fulltrúi E-listans verður að skýra betur og benda á dæmi um.“ Að öðrum kosti eigi Georg Eiður að biðjast afsökunar.

„Ég harma það að bæði framkvæmdastjóri, formaður og varaformaður Framkvæmda- og hafnarráðs hafi farið með ósannindi varðandi upplýsingagjöf til handa fulltrúum Eyjalistans í Framkvæmda- og hafnar­ráði er varðar ráðningu slökkviliðsstjóra,“ segir í svarbókun Georgs Eiðs Arnarsonar.