Utanríkisráðherra: „Við erum alls ekki að ganga of langt í fjölgun sendiherra“

Utanríkisráðherra segir ekki verið að bæta í í utanríkisþjónustunni með fjölgun sendiherra um áramótin og opnun sendiskrifstofunnar í Strasbourg. Hann segir utanríkisráðuneytið hafa hagrætt meira en flest önnur ráðuneyti frá hruni.

Nærri helmingur starfandi sendiherra í íslensku utanríkisþjónustunni hefur aðsetur hér á landi - af þrjátíu og níu sendiherrum mæta nítján til vinnu á Íslandi. Það fjölgaði i þessum hópi um áramótin þegar utanríkisráðherra tilnefndi fjóra nýja sendiherra.

Greint er frá þessu í Fréttablaðinu í dag en þar segist Guðlaugur Þór Þórðarson, þingmaður Sjálfstæðisflokksins, ekki vera í nokkrum vafa um að hægt sé að hagræða í utanríkisþjónustu Íslendinga til að ná fram sparnaði.

„Við erum alls ekki að ganga of langt í fjölgun sendiherra,“ segir Gunnar Bragi Sveinsson utanríkisráðherra. „Við þurfum alltaf að hafa ákveðinn hóp af sendiherrum af því að við þurfum að hafa sendiherra erlendis og svo erum við með ýmis verkefni og stöður í ráðuneytinu sem væri æskilegt að sendiherrar væru í. Hópurinn sem við höfum haft er á bilinu 38 til 43 og það er hæfilegur hópur. Það fylgir í raun enginn auka kostnaður því að vera með sendiherra heima, það er sáralítill launamunur á sendiherra og þeim sem er næst honum, það er, þegar þeir eru heima.“

Stefnt er á að opna sendiskrifstofur á ný í Strasbourg og vilja sumir, þar á meðal Guðlaugur Þór, meina að verið sé að bæta í. Utanríkisráðherra segir það af og frá.

„Við erum að opna aftur í Strasbourg. Þar höfum við verið eina ríkið af tæplega fimmtíu ríkjum sem ekki er með sendiherra á staðnum til að sinna mikilvægum málum. Mannréttindadómstóllinn, sem við Íslendingar höfum því allt of mikla reynslu af, er þarna. Þarna er líka Evrópuráðið. Þannig að Strasbourg er mjög mikilvæg alþjóða miðstöð sem að við þurfum að sinna,“ segir Gunnar Bragi. „Utanríkisráðuneytið hefur hagrætt meira en flest önnur ráðuneyti frá hruni.“